süniy idrakning nishanida tepekkur we héssiyatni kontrol qilishmu bar

süniy idrakning nishanida tepekkur we héssiyatni kontrol qilishmu bar

köznek - 33

türkiye awazi radiyosining hörmetlik ixlasmenliri, türkiye jumhuriyitining paytexti enqeredin, türkiye awazi radiyosi situdiyoliridin hemminglargha otluq salam! «köznek»ke xush keldinglar! «köznek» namliq sehipimizning bu heptilik sanida, süniy idrakning nishanida tepekkur we héssiyatni kontrol qilishmu barliqi heqqide toxtilimiz.

***** ****** ***** *****

süniy idrak téxnika dunyasidiki tereqqiyatta eng halqiliq özgirishlerni bashtin kechürgen sahening biri. uning axirqi nishani insanlarning heqiqiy tepekkuri we yaki hés-tuyghulirini bayqash hemde ulargha yétekchilik qilishtur.

téxnikining tereqqiy qilishi bilen, bolupmu ijtimaiy taratqularning omumlishishigha egiship, qedemmu-qedem nazaret qilinishqa adetlenduq. bizning eng mexpiy uchurlirimizning sanliq uchur ambirida saqlinip qilishimu adettikiche tuyilidighan boldi. bizge qalghini peqet oy – tepekküuimiz we hés- tuyghulirimiz idi, emma emdilikte ularmu bixeter emes. chünki emdiki nishan ularning hemmisini bayqashtur.

undaqta süniy idrak buni qandaq qilishni pilanlawatidu?

beden tili, yüz muskuli, köz herikiti, awaz titrishi hetta hormonning ajrilishi... qatarliqlarning hemmini süniy idrak saheside paaliyet qiliwatqan shirketler mikro tepsilatlarghiche tekshürüsh arqiliq oy - tepekkur we hés - tuyghularni mölcherliyeleydighan bolushqa tirishmaqta.

péshqedem ilmiy tetqiqatchi elke demir süniy idrakning héssiyatni yéshish saheside élip bérilghan xizmetler üstide toxtilip, héssiyatni chüshinish üchün nurghun oxshimighan téxnikilarning ishlitilgenlikini bildürdi we bularning ichide eng omumlashqini «yüz herikiti birliki» téxnikisi ikenlikini éytti.

héssiyat analizida qollinilghan yene bir xil usul, <chongqur tor> dep nam bérilgen mashina öginishi bilen ishqa ashurulidu. <chongqur tor> larda xushalliq, ghezep, qayghu, qorqunch qatarliq héssiyatlarning resimliri mewjut bolup, bu resimlerge belge qoyulidu. hichbir insanning tesirisiz bu resimler <chongqur tor> gha yollinidu we mashina öginishi arqiliq <chongqur tor> uni öginishke bashlaydu. bu chongqur süniy torlar resimler arqiliq héssiyatlarning baghlinishini tekshürüp héssiyatlarni perqlendüreleydu.

bu sistémining kelgüsidiki xetiri

bu sistémilar hazir bir qisim tetqiqat shirketliri we xelqaraliq shirketlerning emgek küchi bölümi teripidin ishlitilmekte. xizmetchi qobul qilishta, muwapiq xizmetchini tépish, heqiqetni ashkarilash yaki jinayetchilerni perqlendürüsh qatarliq jemiyetke nep yetküzidighan nishanlar tilgha éliniwatqan bolsimu, emma bu yerde chong bir soal belgisi bar.

eng deslep insanning eqlige kélidighan mumkinchilik qorqunchluq ehwallarni öz ichige alidu. héssiyatlargha yétip barghan sistéma sizni bir mehsulatni yaki mulazimetni sétiwélishqa asanla qayil qilalaydu. héssiyat arqiliq siyasiy jehettin téximu asan kontrol qilghili bolidu. sistémini ishletküchilerning nishanidiki xelq topi yaki döletlerde chong ijtimaiy hadisilerni chiqirish téximu asangha toxtaydu. hés - tuyghu yaki oy - tepekkur xata analiz qilinishimu mumkin. buning netijiside, kishilik hoquq depsendichiliklirimu yüz bérishi mumkin.

yéngi pisxologlirimiz süniy idrak bolamdu?

süniy idrak bizning héssiyatlirimizni bayqashni dawamlashturush bilen birge, yene bir tereptin uni ongshaydighan, yeni bizning yéngi pisxologimizgha aylinish namzatidur.

pisxologiye we biologiyilik tetqiqat saheside ishlewatqan mutexessisler, dijital fonotiplash sistémisi arqiliq bimarlarni tekshürüshni bashlap boldi. bu tetqiqatta, yanfon qatarliq xususiy üskünilerni ishlitish usulimiz we betlerni örüsh süritimiz qatarliq sanliq melumatlarni chüshkünlükke diagnoz qoyush we dawalashta ishlitishke bolidighanliqini otturigha qoymaqta.

insanlarning zéhnige alaqidar sirlarningmu süniy idrak arqiliq bayqilishi mölcherlenmekte. emma, aqiwetning qandaq bolidighanliqi kelgüside namayen bolghusi.

menbe: t r t xewer