türkiye uchquchusiz ayropilanliri bilen urush uqumini özgertti

türkiye uchquchusiz ayropilanliri bilen urush uqumini özgertti

küntertip we analiz (67)

(jan ajun)

hörmetlik radiyo anglighuchilar! «küntertip we analiz» namliq pirogrammimizning bügünki bölümide  siyaset, iqtisad we jemiyet tetqiqatliri fondi jemiyiti «SETA» ning tashqi siyaset tetqiqatchisi jan ajun teripidin teyyarlanghan «türkiye uchquchusiz ayropilanliri bilen urush uqumini özgertti» témiliq analizni diqqitinglargha sunimiz.

**** **** ** **** * *****

dunya metbuatlirida türkiyening uchquchusiz ayropilan iqtidari we qolgha keltürgen muweppeqiyetliri kün tertip bolushni dawamlashturmaqta. türkiye dölet mudapie sanaiti teripidin ishlepchiqirilghan uchquchusiz ayropilan «SİHA» larning yéngi urush uqumi süpitide ünümlük ishlitilishi süriyede bashlinip, liwiye we qarabaghda  dawamlashti. «SİHA» larning urushtiki utuqliri nurghunlighan armiyelerning diqqitini tartti. amérika, engliye qatarliq döletler türkiyening uchquchusiz ayropilanlirini asas qilghan bu yéngi urush uqumini tekshürüshke bashlidi.

uzun yillardin buyan dölet bixeterliki jehette chong xirislargha duch kéliwatqan türkiye, hem térorluq teshkilatliri qatarliq gheyri simmétrik tehditlerge, hem dölet jughrapiyesi jehettin duch kelgen eneniwi tehditlerge qarshi yéngi urush uqumini barliqqa keltürdi. uchquchusiz ayropilan «SİHA» larni asas qilghan bu yéngi urush uqumi hazir pütün dunyaning diqqitini qozghighan weziyette turmaqta. «SİHA» lar «zamaniwi urush uqumini» ni tüptin özgertidighan bir özgirishning qozghatquchisi dep qaralmaqta.

türkiye yéqinqi on yilda mudapie sanaiti saheside ghayet zor ilgirileshlerni qolgha keltürdi. bolupmu uchquchisiz ayropilan «İHA» we «SİHA» téxnikisi jehette dunyaning bashqa döletliridin intayin ilghar qedemlerni tashlidi. hem «TAI-Aselsan» qatarliq dölet igilikidiki shirketler hem «Baykar» qatarliq xususiy shirketler teripidin ijad qilinghan «ANKA» we «TB2» qatarliq uchquchisiz hujumchi ayropilan süpiliri shundaqla munasiwetlik üskiniler nurghunlighan aldinqi sep we firontlarda ünümlük ishlitishke bashlandi. bolupmu térorluq teshkilati p k k gha qarshi hem türkiye ichide, hem iraq we süriye qatarliq döletlerde uchquchusiz ayropilan «SİHA» larni ünümlük ishlitip, térrorluq teshkilatining seperwerlik iqtidarini chekleshni we atalmish ​​rehberlik qatlimining weyran qilinishini ishqa ashurdi. térorluq teshkilati p k k türkiyege qarshi heriket qilish iqtidarini zor derijide yoqatti. shundaqtimu türkiye «SİHA» larni muntizim we yérim muntizim küchlerge qarshi süriye, liwiye we qarabaghda intayin ünümlük ishlitish bilen birge, düshmen unsurlarning uchquchusiz ayropilan «SİHA» largha jawap qayturalmighanliqi, hetta rosiye ishlepchiqarghan ilghar hawa mudapie sistémiliriningmu taqabil turalmighanliqi körüldi.

 mushu qétimqi qarabagh urushidimu «TB2» ler aktip rol oynidi. nechche yüzligen erméniye tankisi we bronéwiklirini, pantsir we bashqa yuqiri derijilik hawa mudapie sistémilirini shundaqla minglighan piyade eskerlirini bir terep qildi. erméniye armiyesi éghir meghlubiyettin kéyin qarabaghdin chékindi. buningdin bashqa yene, «SİHA» larning düshmen éléméntlirini yoqitipla qalmay, shuning bilen teng bir waqitta singha élish iqtidari, teshwiqat urushi jehettimu mutleq üstünlükke ige qildi.  

emdilikte ilghar zamaniwi qoshunlar türkiyening yéngi urush uqumi we SİHA» lar arqiliq hem gheyri simmétrik, hem eneniwiy muntizim düshmen küchlirige qarshi qolgha keltürgen muweppeqiyetlirini chüshinishke shundaqla bu utuqlarni armiyelirige ögitishke tirishmaqta. türkiye bolsa yene bir qedem ilgirilep, «ANKA» we «TB2»  qatarliq  uchquchusiz ayropilanlirining téximu yoqiri téxnikiliq modili bolghan «AKINCI» we «Aksungur» qatarliq uchquchusiz ayropilanlirining yürüshlük ishlepchiqirishini alliqachan bashlap bolghan ehwalda turmaqta. türkiye «SİHA» téxnikisi bilen rayonda yükselgen küch süpitide namayan bolupla qalmastin, peqet derijidin tashqiri chong küchlerla özgerteleydighan süriye-liwiye-qarabagh qatarliq muhim jeng meydanliriningmu teqdirini özgertmekte.