jumhur reis rejep tayyip erdoghanning baku ziyariti

töwende, «yawroasiyagha nezer» namliq pirogrammimizning bügünki bölümide, abdresul ishaqow teripidin teyyarlanghan «jumhur reis rejep tayyip erdoghanning baku ziyariti» témiliq analizni diqqitinglargha sunimiz.

jumhur reis rejep tayyip erdoghan, ezerbeyjan pirézidénti ilham eliyéwning teklipige binaen, 2020-yili 12-ayning 9-künidin 10-künigiche bakuda ziyarette boldi. 10- dékabir küni, ikki rehber, aldi bilen shéhitler xiyabanini ziyaret qildi, arqidin, qarabaghda qolgha keltürülgen «ziperni tebriklesh parati» gha qatnashti. jumhur reis erdoghan bu yerde  qilghan sözide, mundaq dédi: «bügün hemmimiz  üchün, türk dunyasi üchün zeper we iptixar künidur. bizni bundaq shad – xuramliq künlerni yashash pursitidin behrimen qilghanliqi üchün, rebbimizge shükürler éytimen. qarabagh ezerbeyjandur.» eskertip ötüshke tégishliki shuki, 8 – noyabir  küni, ezerbeyjan jumhuriyiti teripidin qarabaghning zepiri munasiwiti bilen «zeper küni» élan qilinghanidi.

künning kéyinki yérimida, jumhur reis rejep tayyip erdoghan pirézidént ilham eliyéw teripidin  yashlar sariyida resmiy murasim arqiliq qarshi élindi. kéyinche, rehberler ayrim körüshti. körüshüshtin kéyin, qoshma axbarat élan qilish yighini ötküzüldi, hemde ikki dölet otturisida 3 kélishim imzalandi.

axbarat élan qilish yighinida, ikki dölet rehberliri, kawkaz rayonida hemkarliqni yéngi sewiyege yetküzidighan 6 tereplik (ezerbeyjan, giruziye, erméniye, iran, rusiye we türkiye) keng dairilik hemkarliqqa teyyar ikenlikini bildürdi. emelge ashqan teqdirde, rayonni güllendüridighan bu munber teklipi nahayiti muhimdur. lékin iranning bezi rehberlirining jumhur reis erdoghanning «zeper parati» da oqughan «aras» namliq shéirigha bolghan inkasi we uningdin kéyinki özgirishler, téhran hökümitining rayonluq mesililer we qoshnilirigha qarita qandaq bir tereplime qarashta ikenlikini körsitip béridu. yéqinqi künlerde, ermenlerning «tinchliq kélishimi» ni buzidighan ighwagerchilik heriketlirini qiliwatqanliqi toghruluq qarbaghdin xewerler kelmekte. rusiye bilen giruziye otturisida chégra mesilisi dawamlashmaqta. türk jumhuriyetliri bolsa , bularning hemmisige qarimay rayonda tinchliq ornitilishi üchün izchil  tirishchanliq körsetmekte.

bakuda imzalanghan kélishimge asasen, türkiye bilen ezerbeyjan otturisida chégra éghizliridin kimlik ​​bilenla ötüsh mumkin. bu ehwal, iqtisadiy we sayahet sahelirini öz ichige alghan ikki dölet munasiwetlirining yenimu tereqqiy qilishigha töhpe qoshidu.

bakuda 2020-yili, 25 – féwral küni, ikki dölet rehberlirining uchrishishida, tömür yol we turuba liniyesining türkiyedin nexichéwanghiche tutashturulushi nishan qilinghan kélishimler imzalandi. tarixiy zeperdin kéyin, nexchiwanni ezerbeyjan bilen quruqluqtin tutashturush yoli échildi. türkiye ezerbeyjan arqiliq sherq we türk dunyasigha tutashsa, ezerbeyjan türkiye arqiliq gherbke, okyangha tutishidu. eng muhimi, sherq-gherb tiransportida musape qisqiraydu.

qarabagh 5 – 10 yildek qisqa waqit ichide ilgiriki shan-sheripige érishidu. bu heqte eng chong yardemni türkiyening béridighanliqi rehberler teripidin otturigha qoyuldi. türk shirketliri ul eslihe we qurulma mesililiride mol tejribige ige.

ezerbeyjanning qarabagh we uning etrapidiki zéminlarni ishghaldin azad qilishi, heqliq bolghan terepning axirida choqum zeper quchidighanliqini yene bir qétim ispatlap berdi. türkiye bilen ezerbeyjanning buningdin kéyin tashlaydighan ortaq qedemliri, kawkaz rayonining tinchliqining kapaliti bolidu.