türk dunyasi elliri teshkilatliri hemkarliq komitéti yighini

«yawroasiyagha nezer» namliq pirogrammimizning bügünki bölümide, abdresul ishaqow teripidin teyyarlanghan «türk dunyasi elliri teshkilatliri hemkarliq komitéti yighini» heqqide toxtilip ötimiz.

2020-yili 9-ayning 22-küni, türk dunyasi elliri teshkilatliri hemkarliq komitétining tor yighini türk kéngishining bash katipi baghdad amréyéwning riyasetchilikide chaqirildi. yighingha, türkiy tilda sözlishidighan döletler parlamént ezaliri mejlisining bash katipi altinbék mamayusupow, xelqara türk medeniyiti teshkilatining bash katipi dusén kaséyinow, xelqara türk akadémiyesining reisi darhan kidirali we türk medeniti we medeniyet mirasliri fondi jemiyitining reisi günay efendiyéwa qatarliqlar qatnashti.

türk dunyasi elliri teshkilatliri hemkarliq komitéti, 2019-yili 15-öktebir bakuda ötküzülgen 7-nöwetlik türk kéngishi bashliqlar yighinida chiqirilghan qarargha asasen quruldi. türk kéngishi bash katibat bashqarmisi qarmiqida qurulghan bu komitét, türk dunyasi elliri otturisida élip bérilidighan paaliyetlerde tekrardin saqliinish, hemkarliqni kücheytish, maslishish iqtidarini ashurush we türk kéngishi, türkiy tilda sözlishidighan döletler parlamént ezaliri mejlisi, türk akadémiyesi, türk medeniyiti we medeniyet mirasliri  fondi jemiyitining téximu zich hemkarlishishini kapaletke ige qilish yolida xizmet ishleydu.

 yighinda, 2021-yili türk kéngishi, türksoy, türkiy tilda sözlishidighan döletler parlamént ezaliri mejlisi, türk akadémiyesi we türk medeniyiti we medeniyet mirasliri fondi jemiyiti élip baridighan paaliyetlerni ortaq pilanlash heqqide  muzakire élip bérildi. yighin axirida, türk dunyasi elliri teshkilatliri hemkarliq komitétining ezaliri özlirining paaliyet sahesidiki ortaq pirinsiplar toghrisida birdeklik hasil qildi. ezalar teripidin otturigha qoyulghan pikir - tekliplerge asasen, yéqinda türk hemkarliq teshkilatlirining 2020/2021- yilliq yol xeritisi teyyarlinidu. türk kéngishining muawin bash katipi sultan rayéw, komitétqa eza döletler bilen hemkarliq paaliyetlirini élip baridu.

yéqinqi yillardin buyan türk dunyasining ortaq xelqaraliq teshkilatlarning paaliyetliri we pirogrammiliri barghanséri köpeymekte. türk kéngishi teripidin ishqa kirishtürülgen bu maslashturush xizmiti jayida we del waqtida tashlanghan bir qedem idi. bu xil xizmet türk jumhuriyetliri teripidin türk dunyasi otturisidiki hemkarliqni yenimu kücheytish üchün ajritilghan  xamchottin téximu ünümlük paydilinish jehettin nahayiti zor ehmiyetke ige. bu xil paaliyetler mezkur teshkilatlarda ortaq angning shekillinishigimu töhpe qoshidu.

omumen türk kéngishi, xususen türk dunyasi elliri teshkilatliri hemkarliq komitétining téximu ünümlük xizmet qilalishi üchün, türk kéngishide xizmet qiliwatqan mutexessisler sanining köpeytilishi zörürdur. türk kéngishi, yuqirida tilgha élinghan xelqaraliq teshkilatlardin bashqa, türk dunyasining maarip, yashlar we tenterbiye, iqtisad, qatnash, tamozhna, sayahet, diaspora, uchur - alaqe téxnikisi, axbarat we xewerchilik qatarliq sahelerde mas qedemde heriket qilishi we hemkarliqni yenimu kücheytishi, her sahede qurulmishishini ishqa ashurush üchün tirishchanliq körsetmekte. türkiyening istanbul qatarliq sheherliride baklawurluqta oquwatqan türk jumhuriyetliridin talantliq oqughuchilargha türk kéngishida bir yil piraktika qilish pursiti yaritip bérilishi, teshkilatning paaliyetlirige hesse qoshushi mumkin. shuni eskertishimiz kérekki, kéler qétimliq türk kéngishi bashliqlar yighinida, bu teshkilatlar nursultan nezerbayéwning teklipini nezerge élip,  «türkiy tilda sözlishidighan döletler » ibarisini «türk döletliri» ge özgertishi kérek.