türk kéngishining <wuxen wirusi> gha qarshi kürishi
türk kéngishining gha qarshi kürishining hazirqi ehchwali.
türkiye awazi radiyosi: türk kéngishige eza döletlerde «wuxen wirusi» bilen yuqumlinip ölgenlerning sani 200 mingdin éship ketken bolup, bu reqem künséri köpeymekte. shu wejidin, eza döletler sehiye sahesidiki paaliyetlirini yenimu qoyuqlashturghan halda dawamlashturushqa tirishmaqta.
2020 – yili 28 – aprél küni türk kéngishi sehiye ministirliri téléwiziye - téléfon yighini chaqirildi. yighinda, türk kéngishi saghlamliq maslashturush komitétining qurulushi qararlashturulghanidi. 2020 – yili 8 – iyun küni türk kéngishi saghlamliq maslashturush komitétining tunji qétimliq téléwiziye - téléfon yighini ishqa ashuruldi. yighingha, türk kéngishige eza we közetküchi döletlerning muawin sehiye ministirliri qatnashti. yighinda, terepler «wuxen wirusi» ning téximu keng tarqilip kétishining aldini élish, diyagnoz qoyush we dawalash mesililiride özara uchur almashturdi, hemde ortaq hemkarliq pursetliri heqqide muzakire élip bardi. shuning bilen bir waqitta, dangliq tébbiy mutexessislerning ishtirak qilishida tor muhiti astida maarip, bilim ashurush pirogrammiliri, xelqara ilmiy muhakime téléwiziye - téléfon yighinliri chaqirish mesiliside ortaq tonush hasil qildi. türk dunyasi saqliqni saqlash xadimliri deslepki qedemde izmirdiki karantin arilida zenjirsiman ortaq programmilarni ishqa ashuridu. «wuxen wirusi» gha qarshi küreshte ortaq sanliq melumat ambiri we yuqum ehwalini nazaret qilish sistémisi qurush toghrisidimu kélishim hasil qilindi. buningdin bashqa yene, «zenjirsiman teminlesh guruppisi», her bir dölettin 10 alim qatnishidighan «saghlamliq ilmiy guruppisi» qurush qararnamisimu qobul qilindi. aldimizdiki mezgilde türk kéngishi qarmiqida saghlamliq munbiri yighini chaqirilidu.
türk kéngishige eza döletlerning ortaq «wuxen wirusi» waksinisi tetqiq qilip yasash xizmitige türkiyening bashlamchiliq qilidighan bolushi, yighinda maqullanghan muhim qararlardin biri boldi. «wuxen wirusi» basquchini muweppeqiyetlik halda bashquruwatqan türkiye, «wuxen wirusi» waksinisi mesilisidimu paaliyetlirini dawamlashturmaqta. türkiye bishkekte saldurghan toluq eslihelik doxturxana, «wuxen wirusi» gha qarshi küresh dairiside bimarlarni qobul qilishqa bashlidi. türkiyening bashqa türk jumhuriyetlirige qarita tébbiy yardemlirimu dawamlashmaqta.
«wuxen wirusi» basquchidiki tunji pewquladde bashliqlar yighinigha dunya sehiye teshkilatining bash katipini teklip qilghan türk kéngishi, türk dunyasida bu sahede tashlinidighan qedemlerge yétekchilik qilishni dawamlashturmaqta. <wuxen wirusi> bilen yuqumlanghanlar sani barghanséri köpiyiwatqan, ikkinchi we üchinchi yuqum basquchining yüz bérish éhtimalliqi heqqide talash - tartish qiliniwatqan we waksina téxi tépilmighan bir peytte, türk dunyasining halqiliq teshkilati bolghan türk kéngishining saghlamliq sahesidiki bashlamchiliq tetqiqati, «wuxen wirusi» basquchining téximu yaxshi bashqurulushigha zor töhpilerni qoshidu. teshkilat qarmiqida qurulghan saghlamliq ilmiy heyiti we COVID-19 ni közitish sistémisi «wuxen wirusi» gha qarshi küreshte muhim rol oynaydu.
«wuxen wirusi» ning qisqa mezgilde tügimeydighan bolushi, saghlamliq sayahitini öz ichige alghan barliq sahelerning paaliyetlirini izchil dawamlashturushini teqezza qilidu. bu ehwalda, döletler ara munasiwetlerning tereqqiy qildurulushi, insanlarning kündilik hayatining qolaylashturulushi we yardemlishishning aldinqi pilangha chiqirilishi, qérindashliqning teqezzasidur.
«wuxen wirusi» bilen birlikte gherbte bezi döletlerning saghlamliq sistémilirining weyran bolushi, saghlamliq sistémisining döletning közitishi we himayisi astida bolushning zörürlükini ispatlap berdi. türk jumhuriyetlerning buningdin tejribe – sawaqlarni yekünlep, türkiyening rehberlikide saghlam ortaq sehiye tori shekillendürüshi mumkin. derweqe, sehiye sahesidiki bu ortaq paaliyetler, «türk kélechiki – 2040» istiratégiyesining saghlamliq pirogrammisigha saghlam zémin hazirlap béridu.
