jumhur reis rejep tayip erdoghanning baku ziyariti

jumhur reis rejep tayip erdoghanning baku ziyariti

«yawro asiyaning küntertipi» namliq pirogrammimizning bügünki bölümide jumhur reis rejep tayyip erdoghanning baku ziyariti üstide toxtilimiz.

***** ***** *** **** *** *****

jumhur reis rejep tayip erdoghan 8 – nöwetlik türkiye- ezerbeyjan yuqiri derijilik istratégiyelik hemkarliq kéngishigha qatnishish üchün  2020 - yili 25 – féwralda, bakuda resmiy ziyarette boldi. prézidént ilham eliyéw bakuda jumhur reis rejep tayyip erdoghanni resmiy murasim bilen qarshi aldi. andin ikki rehber ayrim uchrishish ötküzdi. türkiye - ezerbeyjan yuqiri derijilik istratégiyelik hemkarliq kéngishi yighinidin kéyin, ikki dölet arisida 14 kélishim imzalandi.

hazirgha qeder, ikki dölet (TANAP) baku - tiplis- qars tömür yoli qatarliq chong layihilerni imzalashqan bolup, bakudiki yighinda, tömür yoli we turuba liniyesining nehchiwanghiche uzartilishigha dair kélishim tüzüldi. enqere- baku tömür yol léniyesining échilishimu eng qisqa waqitta ishqa ashurilidighan boldi. hazar (kaspiy) déngizini chöridigen tömür yol liniyesi pütkendin kéyin, ottura liniye arqiliq sherq bilen gherb otturisida üzlüksiz tömür yol tiransporti mumkin bolidu. bu arqiliq sherq bilen gherbtiki türkiy xelqlermu bir-birige téximu yéqinlishidu. türkiye ezerbeyjan arqiliq sherqqe we türk dunyasigha échilsa, ezerbeyjanmu türkiye arqiliq gherbke we déngiz- okyangha échilalaydu. bu ikki terep munasiwetlirining qatnash we énérgiye sahesidiki eng muhim yadroluq küchi hésablinidu.

türkiye - ezerbeyjan soda omumiy sommisi 2019 – yilida 4.5 milyard amérika dollirigha yetken idi. rehberler bu sanni 2023 - yili 15 milyardqa yetküzüshni nishan qilmaqta. ezerbeyjanda paaliyet qiliwatqan türkiye shirketlirining sani 4 minggha yéqinlashti. 15 xil oxshimighan mehsulatta öz- ara tamozhna béji kechürüm qilish we étibar bérishni öz ichige alghan bu qétimqi kélishimler, özara wizini emeldin qaldurush we hemkarliq sahelirini köp xillashturush qatarliq nishanlarningmu emelge éshishini mumkinlikke ige qilidu.

******* *******

rehberler bakuda xojaili qirghinchiliqining xatire yili munasiwéti bilen qarabaghning ezerbeyjan zémini ikenlikini yene bir qétim jakarlidi. mesilining hel qilinishi üchün yawropa bixeterlik we hemkarliq teshkilati minsik guruppisining emeldin qaldurulishi shundaqla türkiye we qazaqistannimu ö. ichige alghan rayonning küchlük we munasiwetlik döletliridin teshkil tapqan yéngi bir guruppining qurulishi paydiliq bolghusi.

bixeterlik saheside birleshme manéwir élip bériliwatqan bolup, rehberler bu manéwirlarning sanining 2020 - yilida köpeytilidighanliqini, mudapie sanaiti saheside ortaq ishlepchiqirish mesilisining muzakire qiliniwatqanliqini élan qildi. qarabaghning qayturup élinishi we rayon xaraktérliq tinchliqning berpa qilinishi üchün türkiye we ezerbeyjanning bixeterlik we mudapie saheliridiki hemkarliqi shert.

tüzülgen kélishimge asasen ikki dölet otturisidiki wizasiz turush mudditi 90 künge uzartildi. bu ehwal iqtisad we sayahet saheliri qatarliq ikki dölet munasiwitining téximu tereqqiy qilishigha hesse qoshqusi.

**** ***** ***** *****

hörmetlik radiyo anglighuchilar, türkiye we ezerbeyjan yaxshi - yaman her qandaq sharaitta bir – birining yénida turup, ülgilik hemkarliqni namayan qilip kelmekte. hem dölet rehberliri, hem alaqidar idare, organliri shundaqla ezerbeyjan we türkiye xelqliri eng deslep bir – biridin hal soraydighan, bir – birige   eng deslep yardem qollirini sozidighan halette turmaqta. türkiye éléktronluq dölet sistémisi jehettiki tejribilirini ezerbeyjan bilen ortaqlashmaqta. ezerbeyjanmu chetellerde hemmidin köp türkiyege meblegh salmaqta.  türkiye shirketlirimu eng köp ezerbeyjanda paaliyet qilmaqta. türkiye we ezerbeyjan otturisidiki hemkarliq we özara maslishishning bashqa türk jumhuriyetliri otturisidimu ishqa ashurulishi zörür.