bursa we jumalikizik yézisi

bursa we jumalikizik yézisi

hörmetlik radiyo anglighuchi qérindashlar! qedriye shenel teripidin teyyarlanghan «türkiyede sayahetchilik» namliq pirogrammimizning bügünki sanida silerge bursa we jumalikizik yézisini tonushturimiz.

***** **** *****

türkiyening marmara rayonida eslidiki tarixiy körünishi we qurulmisini buzmay saqlap kelgen heqiqy qedimiy öyler we kochilardin shekillengen jumalikizik namliq güzel bir yéza bar. «osmanli xelipiliki dewride yéza turmushi qandaq idi?» dep qiziqidighan sayahetchilerning eng köp sayahet qilidighan merkizi.

bursa wilayitige tewe jumalikizik bilen bursa teng birla waqitta 2014 – yili b d t maarip, ilim – pen we medeniyet teshkilati «UNESCO» ning dunya medeniyet mirasi tizimlikige kirgüzülgen idi. bu rayon osmanli impériyesining qurulishigha shahit bolghanliqi nuqtisdinmu muhim ehmiyetke ige hésablinidu.

osmanli impériyesining tughulghan yéri hésablinidighan bu rayonda dunya medeniyet mirasi tizimlikige kirgüzülgen 6 jay bolup, bular orxan ghazi külliyesi we etrapidiki bazar rayoni, xudwendigar külliyesi, yildirim külliyesi, muradiye külliyesi we jumalikizik yézisidin ibarettur. 

osmanli impériyesining tunji paytexti bolghan bursa 14 – esirning bashliridin étibaren jemiyet, medeniyet we soda – iqtisad jehettin izchil tereqqiy qilghan idi. osmanli dewride sheherge onlighan chong jame, medrise, meqbire, bazar, hammam, parawanliq orni, shipaxane we üsti yépiq matachiliq bazarliri yasalghan idi. bursaning sheherlishish shekli kéyin qurulghan osmanli – türk sheherlirigimu ülge bolghan idi.  bursaning dunya mirasimi tizimlikige kirishige seweb bolghan tarixqa bay qurulmisi bolsa, bir anadolu dölitining dunya impériyesige aylinishighiche bolghan jeryanni namayan qilip béridighan izlargha tolup tashqanliqidur. bu yer osmanli impériyesining texminen 700 yilliq tarixida yasalghan qurulushliri jehettin insanni goya tarix seylisige chiqiridu. 

bursaning sheher merkizidin 13 kélométir yiraqliqta ulutagh éteklirige jaylashqan jumalikizik yézisi hem tarixiy qurulush sheklini, hem eneniwiy turmush sheklini bügünge qeder öz piti saqlap kelmekte.

eng doslepki osmanli dewri qurulush sheklini hazirghiche yashnitip kéliwatqan özgiche öyler, yamghur yaghqan künlerde suning éqip kétishi üchün otturi qanal tezzide tash yatquzup yasalghan kochilar we eneniwiy qurlushliri bilen xuddi bir üsti ochuq muziygha oxshaydu. xish öyler, renggareng tamlar, kochilardiki cheshmiler bilen ziyaretchini goya bügünki dewrdin üzüp élip, ötmüshke bashlaydu.

jumalijik her yili minglighan sayahetchilerni kütüwatqan bolsimu, yenila tiriqchiliq ishliri buzulmastin dawamlashmaqta. yéza xelqi öz mehsulatlirini yéza meydanidiki supilarda bazargha sélip kelmekte.

bursani ziyaret qilmaqchi bolghan tingshighuchilirimizgha tewsiyemiz shuki, ajayip körkem tebiiy menzirisi bilen ulutaghni körmey, shipaliq suliri bilen tonulghan arshanglirigha barmay, bursaning yépekliridin almay, ataqliq eneniwiy tamaqiliridin iskender kawipi, kamal pasha tatliq turimi we kastane (yawa yangaq) halwisi qatarliqlarni tétip baqmay turup hergiz kétip qalmang. 

hörmetlik radiyo anglighuchi qérindashlar! yuqirida qedriye shenel teripidin teyyarlanghan «türkiyede sayahetchilik» namliq pirogrammimizda bursa we jumalikizik yézisini tonushturüp ottuq, tingshighiningqlar üchün rexmet.