azabtin emin bolush iman éytqan, imangha mushriklikni arilashturmighan ademlerge mensuptur

türkiye awazi radiyosi: enam sürisi, 82 – 90 – ayetler.  azabtin emin bolush iman éytqan, imangha mushriklikni arilashturmighan ademlerge mensuptur, ular hidayet tapquchilardur[82]. öz qewmige reddiye bérish üchün ibrahimgha bergen delilimiz ene shudur, xalighan kishimizni bir qanche derije kötürimiz, perwerdigaring heqiqeten hékmet bilen ish qilghuchidur, hemmini bilgüchidur[83]. biz ibrahimgha ishaqni, yequbni ata qilduq. ularning her birini hidayet qilduq. (ibrahimdin) ilgiri nuhni hidayet qilduq, ibrahimning ewladidin dawud, sulayman, eyyub, yusuf, musa, harunlarni hidayet qilduq, yaxshi ish qilghuchilarni mushundaq mukapatlaymiz[84]. zekeriya, yehya, isa we ilyaslarni hidayet qilduq, ularning hemmisi yaxshilardindur[85]. ismail, ilyese, yunus we lutlarni hidayet qilduq, ularni (öz zamanidiki) tamami jahan ehlidin üstün qilduq[86]. ularning ata ـ bowiliridin, ewladliridin, qérindashliridin bezilirini hidayet qilduq, ularni talliduq, ularni toghra yolgha yétekliduq[87]. allahning toghra yoli ene shudur, allah bendiliridin xalighan kishilerni shu yolgha bashlaydu. eger ular (yeni shu peyghemberler) shérik keltürse idi, ularning qilghan yaxshi emelliri, elwette, bikar bolup kétetti[88]. ulargha kitabni, hékmetni we peyghemberlikni ata qilduq, eger bu mushriklar ularni (yeni kitab, hékmet we peyghemberlikni) inkar qilsa, ularni inkar qilmaydighan bashqa bir qewmge tapshurimiz[89]. ene shular (yeni mezkur peyghemberler) allah hidayet qilghan kishilerdur, ularning yoligha egeshkin, (i muhemmed! qewmingge) éytqinki, «quranni tebligh qilghanliqimgha silerdin héchqandaq heq telep qilmaymen, quran peqet pütün jahan ehli üchün wez ـ nesihettur»[90].