türkiye 2-nöwetlik xitay tetqiqatliri ilmiy muhakime yighini we türkiyede sinologiye tetqiqati
doktor erkin ekrem ependining türkiye 2-nöwetlik xitay tetqiqatliri ilmiy muhakime yighini we türkiyede sinologiye (xitayshunasliq) tetqiqati toghrisida élip barghan analizi
![türkiye 2-nöwetlik xitay tetqiqatliri ilmiy muhakime yighini we türkiyede sinologiye tetqiqati](http://cdn.trt.net.tr/images/xlarge/rectangle/8f6d/804f/6e92/590b30a19381e.jpg?time=1718960501)
xitayning türkiyede turushluq elchixanisi bilen xitay xelqara alaqe jemiyiti, enqere siyasetler merkizi we xelqara ilmiy we tetqiqat merkezliri weqpesi qatarliq orunlar hemkarliship paytext enqerediki hilton méhmanxanisida türkiye 2-nöwetlik xitay tetqiqatliri ilmiy muhakime yighini ötküzdi. yighingha türk we xitay tetqiqatchilar bolup köp sanda kishi qatnashti, yighinda türkiyede sinologiye (xitayshunasliq)tetqiqatining omumiy ehwali, türk tarix tetqatlirida xitay menbelirining roli, köktürk qaghanliqi dewirdiki xitay-türk munasiwetliri, xitayning «bir belbagh we bir yol layihesi»dairiside xitayda yashawatqan musulman az sanliq milletlerning türkiye bilen xitay otturisidiki medeniyet munasiwetlirini kücheytishiki ehmiyiti, xitaydiki qézilma xizmetliride tépilghan soghdi mazarliqliridiki adettin tashqiri mexluqlarning ehwali, bir belbagh we bir yol layihesi dairiside türk-xitay munasiwetlirini kücheyitishte pursetler we xeterler, milletlerning bir-birini chüshinishte chüshenchining muhimliqi, xitayning tereqqiyat endizisi we tedbiqlinish ehwali, nöwette türk-xitay siyasiy we iqtisadiy hemkarliq mesilisi, xitayning dunya iqtisadida tutqan orni, türkiye-xitay munasiwetlirining yüzlinishi qatarliq témilar boyiche ilmiy maqalilar oqup ötüldi. yighinda yene türkiye we xitayning emeliyette bir-birlirini yaxshi bilip ketmeydighanliqi, ikki dölet diplomatik munasiwet ornatqanliqi 45 yil bolghan bolsimu lékin türkiyede xitay tetqiqatliri boyiche aran 2-qétimliq ilmiy muhakime yighin chaqirilghanliqimu alahide eskertildi.
dunyada bolupmu türkiyede sinologiye (xitayshunasliq)qandaq chüshinilidu, türkiyede xitayshunasliq tetqiqatining tereqqiyati we omumiy ehwali qandaq? türkiye 2-nöwetlik xitay tetqiqatliri ilmiy muhakime yighini échilish meqsiti, yighinda oqup ötülgen ilmiy maqaliler, qatnashqan tetqiqatchilar we yighinning échilghan waqti qatarliqlargha asasen bu qétimliq yighingha qandaq baha bérish mumkin?