osman sinawning qisqiche hayati

pishqan filim ishligüchi, dangliq rizhéssor, hérismen sénarist osman sinaw 1956- yili türkiyening burdur shehiride örp – adet qarishi küchlük bir dindar ailide dunyagha keldi. ailisining binakar bolup yétishturush istikige boysunmighan osman sinaw, 1975- yili istanbul döletlik güzel – senetler akadémiyesining resim bölümini püttürüp, kiyim layihelesh bilen shughullandi. 1977- yili istanbul döletlik güzel – senetler akadémiyesining hem toqumuchiliq layihelesh kespi hem kino – téléwiziye inistitutigha oqushqa kirip, 1979- yili oqushini püttürdi. oqush püttürgendin kéyin élan yéziqchiliqi bilen shughullandi. 1984- yili «sinegraf» namliq filim shirkitini qurup chiqti. 1984- yilidin 1987- yilighiche bolghan ariliqta 500 din artuq élan filimining ishlinishide rol oynidi. ene shu yillardin tartipla qedem basqan kino – filim, köp qisimliq téléwiziye tiyatirliri, drama ishlesh we ulargha rizhéssorluq qilishni ta bügüngiche dawamlashturup kelmekte.
1987- yili «bir muherrirning ölümi» namliq tunji filimini tamashibinlar bilen yüz körüshtürgen osman sinaw, «yalghan shepeq», «atliq chömüle», «hunkarning bir küni», «kichik dunya», «söygüdek biri yoq», «ishiklerni échish», «uzun hékaye», «hünkar we chüsh», «yalghanchi», «muhebbet qizil», «bigunahlar», «partizan», «ot yürek» we «parizh: gilas herikiti» qatarliq filimliri bilen türkiye kinochiliqigha körinerlik töhpilerni qoshti.
1990- yillarning bashliridin tartip küchini herqaysi téléwiziye qanalliri üchün köp qisimliq téléwiziye tiyatirlirini ishleshke merkezleshtürdi. filim ishlesh, rizhéssorluq qilish saheliride iqtidarini namayan qilghan osman sinaw, 1991- yili «etige külümsirep béqish» (12 bölüm), 1994- yili «pewquladde ata», 1996, 1997- yilliri «padishahning hayati (6 qisim), 1997, 1998- yilliri «jiddiy peytler (23 qisim), yene shu yili «perishte qorosi» (13 qisim), 1998- yili «yéshil chüshler» (13 qisim), 1998- yili «ot yürek», 1999- yili «hayat rishtiliri», 2002 bilen 2004- yilliri arisida «tirikchilik» (71 qisim), 2000- yili «melek xanim», 2002- yili «böriler wadisi», 2005- yili «ishiklerni échish», 2005- 2006- yilliri «achchiq hayat» (59 qisim), 2006- yili «pusat» (13 qisim), 2007- yili «parizh: zeherlik chékimlik térrori», 2008- yili «aldirash ötken yillar», 2009- yili «polkqa qarshi isyan», 2009- yili türkiye radiyo – téléwiziyesi üchün ishligen «sakarya firat», 2010- yili «qilich küni», 2011- yili «arimizdiki tam» shundaqla nöwette dawam qiliwatqan (2014- yil) «qizil alma» we «xatasiz insan bolmaydu» qatarliq tamashibinlarning alahide qiziqishini qolgha keltürgen we yuqiri bahasigha érishken köpligen köp qisimliq téléwiziye tiyatirlirini ya özi ishlidi yaki ulargha rizhéssorluq qildi. u ishligen bir qisim köp qisimliq téléwiziye tiyatirliri türkiye chégraliridin halqip dunyaning oxshash bolmighan jaylirida qoyuldi, köpligen tillargha terjime qilindi.
osman sinaw 2002- yilidin 2004- yilighiche dunyaning her qaysi jaylirida alahide qiziqish ichide körülgen, türk köp qisimliq téléwiziyechiliki nuqtisida alahide muhim orunni igiligen «böriler wadisi» namliq köp qisimliq téléwiziye tiyatirining deslepki 55 bölümige rizhéssorluq qilghan bolup, «börilerning wadisi» ning kéyinki qisimliri u sizip bergen liniyeni boylap bashqa bir kino – filim shirkiti teripidin ta bügüngiche dawamlashturulup kelmekte. u «böriler wadisi» namliq köp qisimliq téléwiziye tiyatiri arqiliq qara goroh, yer asti teshkilat dégenlerning xelqning tonushidiki qara kiyim kiyip, qara köz eynek taqap yüridighan, qoralliq on – onbesh adem bilen kélip birlirini urup, birlirini mesuliyetsizlerche öltüridighan chomaqchilar emes, eksiche nöwiti kelgende qanun chiqiridighan, chiqarghuzalaydighan, qanunlargha özgertish kirgüzeleydighan, ministirlarni almashturalaydighan, küntertipni belgiliyeleydighan, döletning gheyri resmiy iqtisadini kontrol qilalaydighan bir küch ikenlikini roshen shekilde otturigha qoyup, küchlük ghulghula qozghidi.
oxshashla «ot yürek» namliq köp qisimliq téléwiziye tiyatirining 1998 we 2002- yilliri arisida türk tamashibinliri bilen yüz körüshken 113 qismigha rizhéssorluq qilip alahide yuqiri ünüm yaratti. osman sinawning xususen bu ikki köp qisimliq téléwiziye tiyatirining bunchiwala küchlük qiziqish qozghishida bashqa bir qatar amillar bilen birge ularning qara goroh, yer asti teshkilat we siyasiy munasiwetlerni chinliq asasida yurutup bérishke tirishishi, heq – naheq arisidiki küreshning rehimsiz we keskinlikining roshen eks étishi qatarliqlar muhim rol oynighan bolsa kérek. osman sinaw bir gézitning ziyaritini qobul qilghanda, «ot yürek» yüzde yüz méning qarashlirimini eks ettüridu, dégenidi. bulardin bashqa osman sinaw rizhéssorluq qilghan «pewquladde ata» we «tirikchilik (ekmek teknesi)» dégendek köp qisimliq téléwiziye tiyatirliridiki yumuristik til we sehnilermu türk tamashibinlirini özige alahide jelp qildi.
osman sinaw bilen sulayman chobanoghlu birlikte ishligen «qizil alma» namliq köp qisimliq téléwiziye tiyatiri 2014- yili 15- yanwarda TRT-1 qanilida körürmenler bilen yüz körüshkendin tartipla alahide küchlük qiziqish qozghidi. türkiye téléwiziyechiliki üchün yépyéngi bir téma bolup hésablinidighan «qizil alma» türkiye dölet bixeterlik idarisi yaki türkiye milliy istixbarat teshkilati (m t) ning istixbarat urushini arqa körünüsh qilghan bolup, bir menide türkiyening dölet ichi – sirtidiki rohini, türkiye duch kéliwatqan bir qisim tehditlerni yiraqtin bolsimu aydinglitip bermekte.
charek esirdin köprek waqtini türkiye kino – filim, köp qisimliq téléwiziye tiyatirliri we drammilargha ajratqan osman sinaw eyni waqitta rizhéssorlar jemiyiti bilen kino esiri kesip ehliliri birlikining ezasi, kino filimliri jemiyitining idare heyiti ezasidur. rizhéssor osman sinaw «méning muweppeqiyet ölchimim xelqqe yétishtur» ishligen yaki rizhéssorluq qilghan filim yaki köp qisimliq téléwiziye tiyatirlirim xelqning alqishigha érishmey turup alghan mukapatlar «méni hayajanlanduralmaydu» dégen bolsimu, 1994- yilidin boyan onlarche qétim «eng yaxshi rizhéssor», «eng yaxshi filim ishligüchi» mukapatlirigha, yene «altun képinek», «altun koza» we «altun aplisin» mukapatlirigha érishti.
osman sinawning kespke bolghan tonushi nahayiti yuqiri bolup, bu heqte «men senet bilen shughullinimen. senet her qandaq idiologiyedin üstün turidu.» deydu.
1985- yili tangül özbel bilen öylengen osman sinawning töt oghul perzenti bar.
hörmetlik radiyo anglighuchilar! yuqirida ‹küntertiptiki shexs› namliq küntertiptiki muhim shexsler tonushturulidighan mezkur sehipimizning bügünki bölümide, türkiyelik dangliq kino – filim rizhéssori osman sinaw bilen tonushup chiqtuq. aldimizdiki hepte yene bir dangliq kino – filim rizhéssori nuri bilge jeylan bilen tonushup chiqimiz. köngül qoyup tingshighanliqinglar üchün rehmet!
paydilanghan menbe: osman sinaw info we agéntliqlar