«t r t world puqralar insanperwerlik kino féstiwali» ning mukapatliri tarqitildi

türkiye awazi radiyosi xewiri: jumhur reislik mehkimisi uchur-alaqe idarisining bashliqi fahrettin altun, t r t bash mudiri mehmet zahid sobaji we t r t mudiriyitining ezaliri «5-nöwetlik t r t world puqralar insanperwerlik kino féstiwali» da netijige érishkenlerning mukapatini tarqitip berdi.

wéngiriyelik artis akos kowaks birinchilik mukapatini, iranliq artis aliriza qazimpur ikkinchilik mukapatini, kosowuluq artis samir qaraxoda üchinchilik mukapatini tapshuruwaldi.

féstiwalda «kilimat» we t r t alahide mukapatimu tarqitildi.

t r t alahide mukapati ghezzege bérildi. pelestinlik rézhissor ehmet salihqa bérilgen bolsimu, u murasimgha qatnishalmidi.

jumhur reislik uchur-alaqe ishliri idarisining bashliqi fahrettin altun: «bu féstiéwal t r t ning <özi sözi insan> dégen ang bilen ijra qiliwatqan tarqitish siyasitining eng muhim körsetküchi. pütkül dunya iqtisadiy kirizislar, yuqumluq késeller, acharchiliq, kilimat özgirishi we köpiyiwatqan toqunushlar sewebidin intayin muhim halqiliq peytlerdin ötken bu künlerde, dert-elem we charesizlik bilen telmürüwatqan milyonlarche kishige, senetning küchi arqiliq diqqetni merkezleshtürgen féstiwalni intayin qimmetlik hésablaymen» dédi.

u türkiyening xelqaraliq mesililerde insaniy nuqtigha ehmiyet bergenlikini, t r t ning buninggha muhim töhpilerni qoshuwatqanliqini eskertip, t r t rehberlirige teshekkür éytti.

u isirailiyening ghezzege qiliwatqan hujumliri üstide toxtilip, isirailiyening héchqandaq qanunni közge ilmaydighan insaniyetke xilap heriketlirining, zulum we sistémiliq qetliamni teng élip kelgenlikini bildürdi.

u sözini mundaq dawamlashturdi:

«yillardin buyan <pelestin mesilisi> déyilip kelgen idi. undaq emes, mesilining ismi <isirailiye mesilisi> dur. peqet ottura sherqla, yaki rayonimizla emes, belki pütkül dunya bu mesilini körüwatidu.»

t r t  bash mudiri mehmet zahid sobaji: «peryatliri anglanmighan kishilerning hékayisini anglitishqa mejburmiz. t r t world puqralar insanperwerlik kino féstiwalini, dunyaning wijdan awazi bolghan türkiyede ötküzgenlikimizdin we diqqitini insaniy mesililerge merkezleshtürgen kishilerni dölitimizde kütüwalghanliqimizdin xushalmiz. bu yilqi (2023) féstiwalgha, türkiye, ispaniye, amérika, firansiye, hindistan, nigériye, qirghizistan, pakistan, wéngiriye we pelestin qatarliq döletlerdin 370 filim iltimas sundi» dédi.

u ghezzediki tiragédiyeler we isirailiyening wehshiyliki üstide toxtilip: «isirailiye 7-öktebir (2023) din buyan ghezzede omumiyüzlük halda qetliam yürüzmekte. kichik bala, bowaq, ayal, aghriq démestin, doxturxanilarni, muqeddes makanlarni, mekteplerni, musapirlar lagérlirini bombardiman qilip, jinayet ötküzmekte» dédi.