bügün 24-noyabir oqutquchilar bayrimi...
maarip ministiri ziya selchuq 24-noyabir oqutquchilar bayrimi munasiwiti bilen, 81 wilayettin kelgen oqutquchilar bilen birlikte mustapa kamal atatürk xatire sariyini ziyaret qildi.
türkiye awazi radiyosi xewiri: maarip ministiri ziya selchuq we uninggha hemrah bolghan ministirliq emeldarliri hemde oqutquchilardin teshkillengen heyet, atatürk xatire sariyigha keldi we atatürkning qebrisige gülchembirek qoyup, hörmette turdi.
ministir ziya selchuq arqidin xatire sariyi deptirige béghishlima yazdi. u mundaq dep yazdi:
«bash oqutquchimiz eziz atatürk, xelqimizning yoligha chiragh tutup yorutidighan oqutquchilirimizning ‹24-noyabir oqutquchilar bayrimi› munasiwiti bilen, huzurungizgha kelduq. weten ewladlirining istiqbali üchün maarip we oqu-oqutushning her bir basquchida, xelqimiz bilen birlikte her qandaq qiyinchiliqtin qorqmay, sewr we qetiy irade bilen bu qutluq yürüshimizni dawamlashturushta, maaripqa köngül bölidighan barliq oqutquchilar bolush süpitide qetiy iradige igimiz.»
u xelq béghishlighan ulugh wezipini, xelq we pütkül insaniyet üchün ilim nuri astida, pütün küchi hemde gheyriti bilen dawam qilidighanliqlirini eskertip: «yéngi ewladlar oqu-oqutushning her bir basquchini, ünümi yuqiri, tesiri küchlük we muweppeqiyetlik qilish üchün, téz sürette bilim we tejribiler bilen qorallinish kéreklikini bilimiz. jumhuriyitimizning bizdin erkin, wijdani hör, ilim-irpani hör bolghan kishilerni kütüwatqanliqini chüshinimiz. küchimizni ulugh xelqimizning we sizning rohingizning tarixta dastan bolghan qetiy iradisidin almaqtimiz. rohingiz shad bolsun» dédi.
ministir ziya selchuq we oqutquchilar xatire sariyining aldida birlikte resimge chüshti.
oqutquchilar bayrimi, oqutquchilarni shereplendürüsh üchün oxshimighan paaliyetler ötküzülüp tebriklinidighan kün. nurghunlighan döletlerde 1994-yilidin tartip her yili 5-öktebir küni b d t ilim-pen, maarip we medeniyet teshkilati-yunésko (UNESCO) ning tewsiyesi bilen oqutquchilar bayrimi süpitide tebriklenmekte.
