bosniyediki prijédor shehiride öltürülgen boshnaqlar depne qilinidu
bosniyediki urushta shimaldiki prijédor (Prijedor) shehiri we etrapida sérblar teripidin rehimsizlerche öltürülgen 86 qurbanning méyiti ete (20-iyul) yerlikke qoyulidu.
türkiye awazi radiyosi xewiri: bügün (19-iyul) 86 qurbanning méyiti sanski most (Sanski Most) sheher merkizidin prijédor shehirige apirilidu we murasim ötküzülidu. arqidin méyitlarning yurtliridiki qebristanliqlargha depne qilinidu.
bu yil depne qilinidighan 86 qurbanning ichide eng yash üch kishi samir garibowij, emin djonlagij we suad klajij bolup, ular 19 yash. eng chongi 61 yashliq bejir besij.
bosniyediki urush yéngidin bashlanghan 1992-yili mart éyida, sabiq yugoslawiyediki dölet bixeterlik teshkilatining bashliqi bolghan sérb simo drljaja (Simo Drljaca), prijédordiki 13 saqchi ponkitida xizmet qilidighan 1775 sérbni bir ay ichide qorallanduridu.
sérb qisimliri 1992-yili 29-aprél kéchisi eyni waqitta nopusining köp qismi boshnaq bolghan prijédor shehirini qolgha kirgüzidu. éghir tipliq qorallar bilen qorallanghan sérb qisimliri 1992-yili 23-may prijédor etrapidiki yézilargha hujum qilip, 102 kichik balini öz ichige alghan 3176 puqrani rehimsizlerche qirghin qilidu.
sérblar 1992-yili 31-may yerlik radiyolarda uqturush qilip, «sérb bolmighanlarning öylirining dérizilirige aq rext ésishini, kochigha chiqqanda qoligha aq lénta chégish» ni telep qilidu.
ishghalchi sérblarning buyruqigha boysunushqa mejbur bolghan sérb bolmighan puqralar, bu usul bilen éniqlinidu. éniqlanghanlar esirler jaza lagérigha ewetilidu, rehimsizlerche qiyin-qistaqqa élinidu we ayaq-asti qilinidu.
prijédorluq texminen 30 ming kishi eyni waqitta omarska, kératérm, kozaraj, trnopoljé we manajadiki jaza lagérlirigha solinidu. onminglarche kishi bolsa, yurt-makanliridin mejburiy qoghlinidu.
