notrédem katédrali üchün xelqaraliq musabiqe uyushturulidu
firansiye bash ministiri édward filip (Edouard Philippe) parizhdiki notrédem katédrali (Notre Dame) da yüz bergen ot apitide köyüp ketken munarlardin birini yéngidin yasash üchün xelqaraliq binakarliq musabiqisi uyushturulidighanliqini élan qildi.
türkiye awazi radiyosi xewiri: firansiye bash ministiri édward filip élsiy sariyidiki ministirlar kéngishi yighinidin kéyin, axbarat élan qilish yighini ötküzdi.
u yawropada eng köp ziyaret qilinidighan jaylardin biri hésablinidighan notrédem katédralida yüz bergen ot apitide köyüp ketken munarlardin birini yasash üchün xelqaraliq qurulush musabiqisining uyushturulidighanliqini, buningdiki meqsetning munarni tarixqa uyghun halda qaytidin yasash ikenlikini bildürdi.
u tarixiy qurulushni qaytidin sélish üchün kéler hepte ötküzülidighan ministirlar yighinida, yéngi qanun layihesining sunulidighanliqini qeyt qildi.
u notrédem katédralidin qutquzuwélinghan bezi yadikarliqlarning lowré muzéyigha qoyulghanliqini we asirash xizmetlirining élip bérilidighanliqini eskertip, pazharni xadimlirining jénini alqinigha élip qoyup katédralgha ketken otni öchürgenlikini éytti. u mundaq dédi:
«ot öchürüwélinmighan bolsa, aqiwiti téximu éghir bolatti» dédi.
u katédralning yéngidin yasilishi üchün pul iane qilghan kishilerning kirim béjida étibar qilinidighanliqini bildürdi.
katédralning yéngidin yasilishi üchün yighilghan ianelerge mesul bolghan stéfan bérn bu heqte élan qilghan bayanatida, hazirghiche 900 milyon yawrogha yéqin iane yighilghanliqini, bu sanning 1 milyard yawrogha yétish éhtimalining barliqini bildürdi.
