erebche «ghazi emir ertughrul» namliq kitab neshr qilindi
ereb dunyasida chong tesir qozghighan türkiye köp qisimliq téléwiziye filimliri, bu rayondiki osmanli tarixigha bolghan qiziqishnimu ashurdi.
türkiye awazi radiyosi xewiri: türkiye radiyo-téléwiziye idarisi (t r t) ning «tirilish ertughrul» namliq köp qisimliq téléwiziye filimi ereb döletliride körüsh rékorti yaratqandin kéyin, ertughrul ghazining hayati erebchide kitab qilip neshr qilindi we iraqta ötküzülgen 46-qétimliq xelqaraliq baghdad kitab yermenkisige qatnashturuldi.
iraq paytexti baghdadta ötküzülgen xelqaraliq kitab yermenkisini ziyaret qilghiningizda «ghazi emir ertughrul» namliq kitab közingizge alahide chéliqidu.
misirliq yazghuchi mensur abdulhekim yazghan kitabta, ertughrul ghazining hayati heqqide tepsiliy melumatlar bérilidu. kitabning muqawisida «tirilish ertughrul» namliq qisimliq tiléwiziye filimining bash rol artisi engin altan düzyatanning filimdin élinghan fotografliridin bashqa, erebche «ertughrul» we uning astida «osmanliqlarning atisi», «osmanli dölitining dunyagha kélishi we kéngiyishining hékayisi» dégen mawzular bar. kitab muqawisining eng üstide, türkche yézilghan «ertughrul» dégen söz bar.
kitabta ertughrul ghazining urush qilish iradisi, jasariti we ailisi heqqidiki uchurlar, osmanli dölitining dunyagha kélishi hemde 600 yildin artuq tarixi keng dairide bayan qilinidu.
kitabta, «ertughrul» dégen isimning menisi ereb oqurmenlerge «er: yigit we esker», «tughrul: yawayi qush» dep chüshendürülidu.
yazghuchi kitabida, oghuzlarning qayi qebilisidin kélidighanliqini, dewrimizdiki kishilerning ertughrul ghazidin tarixiy jehettin tejribe-sawaq yekünliyeleydighan obraz ikenlikini chüshendüridu.
«ghazi emir ertughrul» namliq kitabni kitab yermenkisidin bashqa, misir, iraq, liwan, oman, seudi erebistan, küweyt, liwiye, aljiriye, marakesh, ereb birleshme xelipiliki, behreyn, pelestin, sudan we iyordaniye qatarliq döletlerdiki tarqitish merkezliridin sétiwalghili bolidu.
