meshhur fotografchi ara güler wapat boldi

türkiye awazi radiyosi xewiri: meshhur fotograf muxbiri ara güler istanbulda dawalash ünüm bermey 90 yéshida bu dunya bilen widalashti. doxturxana bashliqi doktor okan özcheker: «ara güler yürek we nepes siqilish sewebidin dawalash astigha élinghan idi. epsus barliq tirishchanliqlirimiz ünüm bermey 17-öktebir saet 23:20 ötkende tiniqi nepestin toxtidi» dédi.

ara güler türkiyede xelqara fotografchiliqida yéngiliq yaritish boyiche nam qazanghan kishilerning eng muhim wekillirining biri idi. ara gülerning wapat bolghanliq xewirining tarqilishi bilen, uning heweskarliri doxturxanigha sel bolup aqti. ara gülerning méyiti shenbe (20-öktebir) küni beyoghlu üch hora ermen chérkawida yerlikke qoyulidighanliqi bildürüldi.

türkiye jumhur reisi rejep tayyip erdoghan ara gülerning wapat bolghanliqi xewiridin kéyin, «ara güler muzéyi» ning diréktori chaghla sarachqa teziye télégrammisi ewetti we uning bilen téléfonda körüshti.

rejep tayyip erdoghan télégrammisida, ara gülerning öziningmu fotografinimu tartqanliqini, uning qaldurup ketken eserliri bilen xeyrilik bilen yad étiilidighanliqini؛ meshhur senetkar süpitide tonulghan ustaz ara gülerning her daim hörmet bilen eslinidighanliqini   tekitlidi.

ara gülerning wapati munasiwiti bilen, siyaset dunyasidiki nurghun kishilermu teziye télégrammisi ewetti.

türkiye muawin jumhur reisi fuat oktay ijtimaiy taratquda tarqatqan teziye mektubida, türkiyening üch meniwi bayliqidin ayrilghanliqini bildürdi. fuat oktay mundaq dédi:

«fotografliri bilen tarixni höjjetleshtürgen fotograf senitining meshhur ismi, dangliq zhurnalist we fotograf muxbiri ara gülerni؛ shéirliri bilen anadolu xelqining awazigha, türk edebiyatining <aq shahi> gha aylanghan bahaettin karakochni؛ türk siyasitide muhim xizmetlerni qilghan bilim adimi piroféssor oya akgönenchni yoqitip qoyghanliqimizdin chongqur qayghurmaqtimiz.»

jumhur reislik sariyi bayanatchisi ibrahim kalin: «her yéshida mol hosulluq bolghan, hayatqa bolghan yuqiri qizghinliqi bilen, jimjit halda künlerche ejir qilip, <u peyt> ni pemiligen ustaz, bizdin ayrildi» dédi.

jumhur reislik sariyi uchur-alaqe merkizining bashliqi fahrettin altun fotograf ustisi ara gülerning istanbul we anadoluning közi, döletning xatirisi ikenlikini bildürdi.

türkiye edliye ministiri abdulhamit gül: «rohi hayat bolghan ara gülerning menzire ramkisidin türkiyeni we kishilirimizni körüsh, bizge hayajan béghishlaytti. rohi shad bolsun!» dédi.

sehiye ministiri fahrettin koja mundaq dédi:

«fotograf senitining meshhur ustazi ara gülerning wapatidin chongqur qayghu ichide xewer taptim. merhumning ailisige, yéqin-yoruqlirigha we senet dunyamizgha sewr tileymen.»

yéza igiliki we orman ministiri bekir pakdemir: «ara güler yashlargha ülge bolidighan nurghun katta eserlerni qaldurup, bizdin ayrildi» dédi.

énérgiye we tebiiy bayliqlar ministiri fatih dönmez: «apparati bilen sansizlighan zamanni menggülükke ige qildi. ailisi we barliq heweskarlirigha sewr tileymen» dédi.

ijtimaiy taratquda sewr tileklirini élan qilghan adalet we tereqqiyat partiyesi (Ak Parti) ning reis wekili numan kurtulmush: «medeniyet we senet dunyamizning chinari bolghan ara gülerni yoqattuq» dédi. partiye bayanatchisi ömer chelikmu teziye télégrammisini ijtimaiy taratquda élan qildi we mundaq dédi:

«ömrining sermayisini ünche-merwayitqa aylandurdi. kishi hayatining we dertlirining shahiti bolghan bir derwish bizdin ayrildi.»