biterep emes, belki tengpung xewerchilikni qollaymiz

türkiye awazi radiyosi xewiri: t r t ning sahibxanliqida, türkiyening axbaratchiliq tejribisini dunya bilen ortaqlishish meqsitide antalyadiki elite lara méhmanxanisida ötküzülgen 5-nöwetlik médya telim-terbiye pirogrammisi uyushturuldi.

t r t bash mudiri ibrahim eren 70 dölettin kelgen 162 médya xizmetchilirige bérilgen tamaq ziyapitide söz qildi. u médya telim-terbiye pirogrammisining türkiyening axbaratchiliq tejribisini dunya bilen ortaqlishishni meqset qilidighanliqini éytti.

u pirogramma ramkisida, téléwiziye, xewer, radiyo we yéngi médya türliri boyiche léksiye yighinlirining uyushturulghanliqini bildürüp, türkiye téléwiziye chatma filimlirining 15 yilda ghayet zor ilgirileshlerni qolgha keltürgenlikini, türkiyede ishlengen 100 din artuq téléwiziye chatma filimining chet ellerge sétilghanliqini tekitlidi.

u «tirilish ertughrul» namliq téléwiziye chatma filimining, türkiye tarixida körürmenler sanida eng chong rékort yaratqanliqini eskertti. u mundaq dédi:

«tirilish filimi 100 din artuq döletke sétiliwatidu, dunyada körülüwatqan téléwiziye chatma filimlirining %30 ni türkiye filimliri igileydu. bu nahayiti muhim reqem. néme üchün türkiyening téléwiziye chatma filmliri bunchilik yuqiri orunni igileydu? chünki türkiye köp medeniyetlik dölet. mundaqche éytqanda, türkiye köp medeniyetlik bolushni qobul qilghan, köp medeniyet bilen yashashni ongushluq hel qilghan we buningdin pexirlinidighan bir dölettur, ijtimaiy qurulmisi jehettin ailige ehmiyet béridighan, ailini merkez qilghan medeniyitimiz bar, bular téléwiziye filimlirimizde eks étidu.»

u türkiye téléwiziye chatma filimlirining her bir qismining ottura hésab bilen 110 minut bolidighanliqini eskertti. u: «türkiyede yiligha 80 din 90 ghiche téléwiziye chatma filimi ishlinidu, bir téléwiziye chatma filimi pesli boyiche 36 hepte qoyulidu, bu nahayiti muqim bir saheni peyda qilidu, riqabet-bu sahede ishlepchiqirilghan mehsulatlarning chet ellerge sétilishini kapaletke ige qilghan amil hésablinidu. türkiye téléwiziye saheside riqabet nahayiti keskin» dédi.

u dunyada xewerchilikning oxshimighan yüzlinishke qarap méngiwatqanliqini bildürüp, mundaq dédi:

«dunyada xelqara xewerchilik déginimizde, bir-ikki qanal ésimizge kéletti. hazir oxshimighan qanallar bu wezipini ötewatidu. t r t bolush süpitimiz bilen, bizning xewerchilik chüshenchimiz boyiche oxshimighan nuqtiiynezerlerni tikleshni ümid qilimiz. xewerchilikni obyéktip bolmaydu dep chüshinimiz, biterep emes, belki tengpung bolghan xewerchilikni qollaymiz. qatil bilen ajizgha oxshash muamile qilalmaymiz. sözümni tekrarlaymen, biz biterep emes, belki tengpung bolghan xewerchilikni qollaymiz. insan bolush süpitimiz bilen, hés-tuyghularni arilashturmay xewerchilik bilen shughullinishimiz mumkin emes. xewerchilik tilimizda, mushu jughrapiyege xas, insanni merkez qilghan, yazghan hékayilirimizde insanni chüshendüridighan til yaritishni nishan qilimiz. silerningmu insanni merkez qilghan, tengpung, dunyawi wijdanning awazi bolidighan xewerchilik bilen shughullinishinglarni, téléwiziyede jemiyetning ijtimaiy éhtiyaji nezerde tutulghan pirogrammilarni ishlishinglarni ümid qilimiz.»