baylar ayalidin ajrashqanda eng éghir tölem töleshke mejbur qalidu
engliye yuqiri sot mehkimisining bir milyardérgha ayaligha 583 milyon dollar ajrishish bedili töleshke höküm qilghanliqi xewer qilindi.
türkiye awazi radiyosi xewiri: engliye yuqiri sot mehkiisi 61 yashliq bir rusiyelik milyardérning burunqi ayaligha 453 milyon pund (texminen 583 milyon dollar) töleshke höküm qildi. buning, engliye tarixidiki ajrishish dewasida chiqirilghan eng chong tölem tölesh toghrisidiki hökümlerning biri ikenliki eskertilmekte.
sotchi ajrashqan bir jupning toy qilghandin kéyin tapqan bayliqlirining %41.5 ni ayalgha bérishke höküm qildi.
sot mehkimisining höjjetlirige asaslanghanda, rusiyelik milyardér besh yil burun rusiyening bir énérgiye shirkitidiki 1 milyard 300 milyon dollarliq pay chékini sétiwetken. sot mehkimisi ajrashqan bir jupning nam sheripini ashkarilashni chekligen bolup, ularning qoramigha yetken oghulliri bar iken. biraq, kawkaz rayonidin bolghan rusiyelik milyardérning kona néfit we tebiiy gaz sodigiri ikenliki, 41 yashliq ayalning sherqiy yawropaliq ikenliki, 2000-yili engliye puqraliqigha ötkenliki bilinmekte. ular 1993-yili rusiye paytexti moskwada tonushup toy qilghan we shu yili londongha makanlashqan.
2014-yili engliyede bir sodiger ajrashqanda, ayaligha 330 milyon pund tölem töligen idi. dunyada bolsa, amérika puqraliqidiki firansuz karxanichi alék wildénstéyin 1999-yili ayali joslin wildénstéyingha 3.8 milyard dollar, axbaratchiliq sahesidiki chong xojayin rapért murdoch 31 yil öy tutqan ayali anna bilen ajrashqanda 1.7 milyard dollar tölem töligen.
