rusiye yadro qorali manéwirining ikkinchi basquchini bashlidi

türkiye awazi radiyosi xewiri: rusiye dölet ministirliqi, pirézidént wiladimir putinning yolyoruqigha asasen, istratégiyelik bolmighan yadro küchliri manéwirining ikkinchi basquchining bashlanghanliqi toghrisida bayanat élan qilip: «manéwir jeryanida rusiye we bélarusiye armiyeliri istratégiyelik bolmighan yadro qoallirini urushta ishlitishni birlikte meshiq qilidu» dédi.

manéwirning rusiye-bélarusiye birleshme dölitining igilik hoquqi we zémin pütünlükini shertsiz kapaletlendürüsh meqsitide élip bérilghanliqigha isharet qilinghan bayanatta, rusiye bilen bélarusiye armiyelirining munasiwetlik xadimlirining istratégiyelik bolmighan yadro qorallirini urushta ishlitishke teyyar haletke keltürüshni nishan qilidighanliqi tekitlendi.

rusiye dölet mudapie ministirliqi 21-may döletning jenubiy herbiy rayonida istratégiyelik bolmighan yadro qorallirini ishlitish manéwiri bashlighanliqini élan qilghanidi.

ministirliq: «manéwir bir qisim gherb emeldarlirining rusiyege qarshi tehditlirini öz ichige alghan qutritish xaraktérlik bayanlirigha jawaben rusiyening yadro küchlirining teyyarliq iqtidarini ashurush, döletning zémin pütünlüki we igilik hoquqini qoghdash meqsitide élip bérilghanliqi»gha isharet qilip ötkenidi.

rusiye ötken yili «natoning bashqa döletlerge taktikiliq yadro qorallirini orunlashturghanliqi»ni ilgiri sürüp, bélarsiyege taktikiliq yadro qorallirini orunlashturghanidi.