xaqan fidan nizhniy nowgorod shehiride lawrow bilen körüshti
tashqi ishlar ministiri xaqan fidan kések altun (BRICS) döletliri tashqi ishlar ministirlirining yighinigha qatnishish üchün yétip barghan rusiyening nizhniy nowgorod (Nijniy Novgorod) shehiride, rusiye tashqi ishlar ministiri sérgéy lawrow bilen körüshti.
türkiye awazi radiyosi xewiri: diplomatik menbelerdin élinghan melumatlargha asaslanghanda, xaqan fidan bilen rusiye tashqi ishlar ministiri sérgéy lawrowning körüshüshide, ikki terep munasiwetliri we rayon mesililiri muzakire qilinghan bolup, türkiye nuqtisidin muhim orunda turidighan iqtisadiy mesililermu küntertipke kelgen. ikki ministir yene, ghezzening nöwettiki weziyiti heqqidimu özara pikir almashturghan.
rusiye tashqi ishlar ministirliqining yazma bayanatida bildürülishiche, ottura sherq we jenubiy kawkaz rayonining nöwettiki weziyitini öz ichige alghan halda xelqara küntertipning asasliq mesililiri muzakire qilinghan. lawrow tashqi ishlar ministiri xaqan fidangha rusiyening kések altun döletliri teshkilatida aldinqi orunda qoyidighan mesililiri toghrisida melumat bergen.
xaqan fidanning nizhniy nowgorod shehiride kuba tashqi ishlar ministiri bruno rodriguéz parilla bilenmu körüshkenliki bildürüldi.
türkiye tashqi ishlar ministirliqi xaqan fidan éks (X) bétide uchur hembehrlep, «ministirimiz <BRICS+> yighinigha qatnishish üchün yétip barghan nizhniy nowgorodta kuba tashqi ishlar ministiri bruno rodriguéz bilen körüshüp, siyasiy we iqtisadiy mesililer, kubagha yürgüzülüwatqan émbargolar, ghezzening nöwettiki weziyitini muzakire qildi» dédi.
qeyt qilinishiche, xaqan fidan «pelestin dewasi» ni qollighanliqi üchün kubagha teshekkür éytqan.
