b d t: gherbiy qirghaqtiki urush diqqetlerdin qéchiwatidu
birleshken döletler teshkilati yéqin sherqtiki pelestin musapirlirigha yardem bérish – xizmet ishlesh orgini (UNRWA) ghezze rayonida urush keskinlishiwatqanda, iyordan deryasining gherbiy qirghiqidiki urushning diqqetlerdin qéchiwatqanliqi toghruluq agahlandurdi.
türkiye awazi radiyosi xewiri: birleshken döletler teshkilati yéqin sherqtiki pelestin musapirlirigha yardem bérish – xizmet ishlesh orginining ammiwi ortaqlishish tor béti X sehipiside, israiliyening ishghaliyet astidiki iyordan deryasining gherbiy qirghiqidiki wehshiylerche zorawanliqining barghanséri ewej élip kétiwatqanliqi heqqide bayanat élan qilindi.
bayanatta, israiliyening iyordan deryasining gherbiy qirghiqidiki herbiy heriketliri, weyranchiliqliri, yolgha qoyuwatqan cheklimiliri we namratliq sewebidin pelestinliklerning qorqunch, éniqsizliq we endishe ichide yashawatqanliqi eskertildi.
ghezze rayonida urush barghanséri keskinlishiwatqanda, iyordan deryasining gherbiy qirghiqidiki urushning diqqetlerdin qéchiwatqanliqi qeyt qilinghan bayanatta, rayondiki jiddiychilikni téximu ewej alduruwétishning kirizisni tinch yol bilen hel qilish nishanigha ziyan yetküzidighanliqi tekitlendi.
israiliye armiyesi 5-ayning 21-künidin 23-künigiche iyordan deryasining gherbiy qirghiqidiki jénin shehiri we jénin musapirlar lagérigha hujum qilghan, hujumlarda 12 pelestinlik hayatidin ayrilghan, 21 pelestinlik yarilanghan, 7 öy pütünley weyran bolghan, yüzligen öy ziyangha uchrighanidi.
