islam hemkarliq teshkilati bashliqlar yighini bayannamesi élan qilindi

türkiye awazi radiyosi xewiri: islam hemkarliq teshkilati xelqara jemiyetni israiliyeni xelqara qanun we birleshken döletler teshkilatining qararlirigha emel qilishqa, sherqiy quddusni öz ichige alghan pelestin zéminliridiki qanunsiz ishghaliyet, mustemlikichilik we irqiy ayrimichiliq qilmishlirini axirlashturushqa mejburlashqa chaqirdi.

islam hemkarliq teshkilatining gambiyening paytexti banjulda chaqirilghan 15-nöwetlik bashliqlar yighinidin kéyin, islam hemkarliq teshkilatigha eza döletlerning dölet we hökümet bashliqliri birdeklik hasil qilghan bayanname élan qilindi.

bayannamede, ghezze rayonidiki pelestin xelqige qaritilghan hujumlarning  derhal we shertsiz toxtitilishi, shundaqla ghezze rayonigha jiddiy yardem bérish, su we tok bilen teminlesh üchün insanperwerlik yardem karidori échilishi telep qilindi.

pelestin xelqini sudin mehrum qaldurush, rayongha yéqilghu kirishige yol qoymasliqni öz ichige alghan irqiy qirghinchiliq we milliy tazilash jinayitining dawamlishish xewipi heqqide agahlandurush bérildi,  pelestinliklerni öz zéminliridin mejburiy qoghlap chiqirish, sürgün qilish  yaki bashqa jaylargha köchürüwétish qilmishlirini qobul qilghili bolmaydighanliqi bildürüldi.

bayannamede yene, islam hemkarliq teshkilatining pelestin xelqining özlirining heq - hoquqlirini qolgha keltürüsh we  paytexti quddus bolghan igilik hoquqluq dölet qurushtin ibaret qanunluq kürishini küchlük qollaydighanliqi qayta tekitlinip mundaq déyildi:

«xelqara jemiyetni ishghalchi israiliyeni xelqara qanun we  birleshken döletler teshkilatining qararlirigha boysunushqa, sherqiy quddusnimu öz ichige alghan barliq pelestin zéminliridiki qanunsiz ishghaliyet, mustemlikichilik we irqiy ayrimichiliq qilmishlirini axirlashturushqa mejburlashqa chaqirimiz.»

«bolmisa toqunush uzungha sozulup kétidu rayonda téximu köp derd – elem we muqimsizliq höküm süridu,  kirizisni ikki dölet charesi arqiliq hel qilish pursiti qoldin kétip qalidu.»

«talash-tartishlarni tinch yollar arqiliq jümlidin diyalog we muresselishish arqiliq hel qilish nahayiti zor ehmiyetke ige. derweqe, bundaq bolghanda islam ümmiti arisida jiddiychiliktin xaliy muhit berpa qilghili bolidu.»