hamas: söhbet axirlashti
hamas misirning paytexti qahirede israiliye dairiliri bilen uda ikki kün dawamlashqan ghezzede urush toxtitish we özara esir almashturush söhbitining axirlashqanliqini bildürdi.
türkiye awazi radiyosi xewiri: hamas teripidin bu heqte élan qilinghan yazma bayanatta, mundaq déyildi:
«qahirediki söhbet axirlashti. hamas wekiller ömiki hamas rehberliri bilen meslihetlishish üchün qahire shehiridin ayrilidu.»
«hamas wekiller ömiki kélishim teklipige qarita jawabini misir we qatardiki muressechilerge yetküzdi.»
bayanatta, kélishim teklipi yaki hamasning bu teklipke qarita jawabi heqqide héchqandaq melumat bérilmidi.
misir bilen qatarning muressechilikide teyyarlanghan yéngi urush toxtitish we özara esir almashturush kélishimi tünügün (5-may) qahirede muzakire qilinishqa bashlanghanidi.
israiliye bash ministiri binyamin nétanyahu xelqara jemiyetning agahlandurushlirigha qarimay, ghezze rayonining jenubidiki kem dégende mejburiy köchürüwétilgen texminen 1.5 milyon pelestinlik panahliniwatqan refah rayonigha yene bir qétim quruqluq hujumi élip baridighanliqlirini bildürmekte.
hamas bolsa, imzalanghusi esir almashturush kélishimide ghezzede uzun muddetlik urush toxtitishqa kapaletlik qilinishini telep qilmaqta.
igilinishiche, israiliyening 7-öktebir (2023) din buyan ghezze rayonida dawamlashturuwatqan hujumlirida jénidin ayrilghan pelestinliklerning sani 35 minggha yetken.
