isirailiye: iranning hujumigha jawab bérilidu

türkiye awazi radiyosi xewiri: isirailiye armiyesi bash ishtab bashliqi xérzi xaléwi kan (KAN) téléwiziyesining ziyaritini qobul qilghanda, iranning jiddiy weziyetni ulghaytishi bilen ghezzening ikkinchi orungha chüshüp qélishini xalimaydighanliqlirini qeyt qildi.

u: «iran tunji qétim öz zémini ichidin biwaste hujum qilghanliqi üchün agahlandurush siziqidin ötüp ketti. buninggha jawab qayturush kérek, dep oylaymen» dédi.

u isirailiye hawa armiyesining irangha qilinidighan hujum éhtimali üchün teyyarliqlarni axirlashturghanliqini eskertti, emma hujumning qaysi shekilde bolidighanliqi toghrisida melumat bermidi.

u irangha qarshi süyiqest heriketliri yaki keng kölemlik tor hujumliri qilinishi mumkinlikinimu ret qilmidi.

isirailiye armiyesining yazma bayanatigha asaslanghanda, xérzi xaléwi iranning 13-apréldiki (2024) hujumida chong buzghunchiliqqa uchrimighan néwatim hawa armiye bazisini ziyaret qilghanda: «aldimizgha qaraymiz, tashlaydighan qedemlirimiz üstide oylinimiz, bunchiwala köp bashqurulidighan bomba we uchqularning isirailiye zéminigha qaritip qoyup bérilishining bir jawabi bolidu» dégen.

isirailiye 1-aprél (2024) iranning süriye paytexti demeshiqtiki elchixana binasini bombardiman qilip, yette iranliqni öltürgen idi. bularning ichide iran inqilabiy muhapizetchiler qismining ikki générali bar idi.

iran buning dölet zéminigha hujum qilghanliq bolidighanliqini we öch alidighanliqini élan qilghan idi. isirailiye bolsa, iranning hujumlirigha jawab qayturidighanliqini bildürgen idi.

iran 13-aprél kéchide isirailiyege qaritip yüzlerche uchqu we onlarche bashqurulidighan bomba qoyup berdi. netijide, isirailiyening bezi herbiy bazilirigha bashqurulidighan bomba chüshkenliki qeyt qilindi.

isirailiye uchqu we bashqurulidighan bombilarning köpinchisining hawa qalqan sistémisi teripidin tosuwélinghanliqini, jenubtiki herbiy bazigha bir bashqurulidighan bomba chüshkenlikini uqturdi.