li chyang bilen jenét yélin bir-birige zit nuqtilarni tekitlidi
xitay bash ministiri li chyang amérika maliye ministiri jenét yélingha, ikki dölet otturisidiki iqtisadiy we soda mesililirini, siyaset bilen xewpsizlik témisi qilish kéreklikini bildürdi.
türkiye awazi radiyosi xewiri: xitay bash ministiri li chyang amérika maliye ministiri yélin bilen béyjingda körüshti. u yélinning küntertipidiki muhim maddilar bolghan xitay tokluq aptomobilliri we qayta hasil bolidighan énérgiye üsküniliri qatarliq bir qisim yéngidin gülliniwatqan sahelerde ishlepchiqirish iqtidarining éship kétish endishesi üstide toxtaldi.
u iqtisad we soda mesililirining siyasiylashturulmasliqi kérekliki üstide toxtilip mundaq dédi:
«biz amérikaning ishlepchiqirish iqtidari mesilisige bazarni asas qilghan halda dunyawi nuqtidin obyéktip we dialéktikiliq qarishini ümid qilimiz» dédi.
li famililik amérika bilen xitay otturisidiki iqtisadiy we soda hemkarliqini kücheytishning yer shari iqtisadining éshishida intayin muhimliqini, her qaysi tereplerning muqim, siyliq we ünümlük hemkarliq üchün ixtilaplarni hel qilish yollirini tépishi kéreklikini otturigha qoyup: «ikki döletning bir-birige düshmen emes, shérik bolushini ümid qilimiz» dédi.
amérika maliye ministiri yélin 4-aprél bashlighan xitay ziyaritidiki uchrishishlirida, xitayda tokluq aptomobil we qayta hasil bolidighan énérgiye üsküniliri qatarliq yéngi sahelerge döletning qollishi astida sélinghan mebleghler netijiside ishlepchiqirish iqtidarining éship kétishining, yer sharidiki tengpungsizliqni keltürüp chiqiridighanliqini bildürdi.
u: «bu sahelerdiki döletning biwasite we wasitilik qollishi xitayning dölet ichidiki éhtiyajidin éship kétidu we dunya baziri bir terep qilalmaydighan ishlepchiqirish iqtidarini yaritip, erzan éksport arqiliq bahani töwenlitip, adaletsiz riqabetni keltürüp chiqiridu. bundaq bolghanda, amérika shirketliri we ishchi-xizmetchilirila emes, belki bu sahediki ishlepchiqirish iqtidarini yuqiri kötürmekchi bolghan hindistan we méksika qatarliq döletlergimu passip tesir körsitidu» dédi.
u bu sahediki teminlesh zenjirlirining rayon we dölet qatlimidiki merkezlishishining, dunya iqtisadining berdashliq bérish küchinimu ajizlitidighanliqi toghrisida agahlandurdi.
