rusiye firansiyeni ukrainagha esker ewetish mesiliside agahlandurdi
rusiye dölet mudapie ministiri sérgéy shoygu firansiye dölet mudapie ministiri sébastiyan lékornugha, ukrainagha esker ewetken teqdirde buning firansiyege mesile peyda qilidighanliqi toghrisida agahlandurdi.
türkiye awazi radiyosi xewiri: rusiye dölet mudapie ministirliqi bayanat élan qilip, ministir shoyguning firansiyening «ching turghan telipi» boyiche firansiye dölet mudapie ministiri sébastiyan lékornu bilen téléfonda körüshkenlikini bildürdi.
bayanatta, lékornuning paytext moskwadiki «krokus xol siti» (Crocus Hall City) konsért zalida yüz bergen térrorluq hujumi toghrisida teziyesini bildürgenliki qeyt qilindi.
bayanatta mundaq déyildi:
«shuning bilen bir waqitta, lékornu hujumning jawabkarliqini térrorluq teshkilati daéshqa dönggep, ukraina we gherb döletlirining térrorluq hujumigha arilashmighanliqigha qayil qilishqa urundi» déyildi.
rusiye dölet mudapie ministiri sérgéy shoyguning térrorluq hujumi toghrisidiki tekshürüshning choqum axirlishidighanliqini we jawabkarlarning jazagha tartilidighanliqini tekitligenliki bildürülgen bayanatta, térrorluq hujumini teshkilleshte ukrainaning qoli barliqigha dair uchurlarning barliqi qeyt qilindi.
bayanatta, sérgéy shoyguning firansiye dölet mudapie ministiri sébastiyan lékornugha, «kiyéw hökümiti gherbning testiqi bolmay turup, héchqandaq ish qilalmaydu. bu ishning arqisida firansiye istixbaratining yoq bolushini ümid qilimiz» dégenliki eskertildi.
ukraina mesilisimu muzakire qilinghan bayanatta, «sérgéy shoygu élisé sariyining firansiye herbiy qisimlirini ukrainagha ewetish heqqidiki bayanlirigha qarita, eger bu emeliyetke aylansa, bu firansiyening özi üchün mesile peyda qilidighanliqini otturigha qoydi» déyildi.
firansiye dölet mudapie ministirliqining mezkur téléfon söhbiti toghrisida élan qilghan bayanatida bolsa, ministir lékornuning konsért zalida yüz bergen térrorluq hujumi toghrisida rusiye dölet mudapie ministiri sérgéy shoygugha, «firansiyening qolida bu hujum bilen ukrainani baghlashqa seweb bolidighan héchqandaq uchurning yoqluqi» ni éytip, rusiyedin bu ehwalni süyiistémal qilishni toxtitishni telep qilghanliqi qeyt qilindi.
22-mart (2024) , moskwadiki «krokus xol siti» konsért zalida yüz bergen térorluq hujumida, 143 adem jénidin ayrilghan idi.
