taliban: «amérika afghanistanning hawa teweliki hoquqigha xilapliq qilmaqta»
taliban hökümiti amérikaning uchquchisiz ayropilanlar bilen uchush élip bérish arqiliq afghanistanning hawa teweliki hoquqigha xilapliq qiliwatqanliqini bildürdi.
türkiye awazi radiyosi xewiri: afghanistan waqitliq hökümiti bayanatchisi zabihullah mujahid amérikaning uchquchisiz ayropilan bilen afghanistan hawa tewelikige köp qétim xilapliq qilghanliqini we özlirining buninggha naraziliq bildürgenlikini tekitlep, amérikidin bu mesilige estayidil muamile qilishni telep qildi.
zabihullah mujahid: «bir qisim yéqin döletlerning hawa boshluqini ishlitip, afghanistangha kelgen bu uchquchisiz ayropilanlar shübhisizki, amérikigha tewedur. hemmeylen bu mesilidiki mesuliyitini tonup yétishi we qanungha xilapliq qilishni toxtitishi kérek» dédi.
zabihullah mujahid ismini tilgha almastin «yéqin döletler» gimu chaqiriq élan qilip, ularning hawa boshluqlirini amérikaning ishlitishige échip bermeslikini telep qildi.
bir nechche kün ilgiri afghanistan metbuatlirida afghanistanning jenubidiki qendihar we nimruz wilayetliride uchquchisiz ayropilanlarning uchqanliqi xewer qilinghan idi.
taliban hökümiti emeldarliri uzundin buyan afghanistanning nurghun rayonlirida uchquchisiz ayropilanlarning uchup yürgenlikini bildürüshken idi.
