tramp torda injil sétishni bashlidi
amérikada noyabirda ötküzülidighan pirézidéntliq saylimining namzatliqi üchün jumhuriyetchilerdin yéterlik wekil sanigha érishken sabiq pirézidént donald tramp, torda injil sétishni bashlidi.
türkiye awazi radiyosi xewiri: sabiq pirézidént donald tramp «Truth Social» da hembehrligen widéoda, saylighuchilirini injil sétiwélishqa chaqirdi.
u uchurida mushu hepte tebriklinidighan « muqeddes jüme» we «paskal» bayramliri üstide toxtaldi.
u mundaq dédi:
«muqeddes heptingiz mubarek bolsun! amérikaning qayta ibadet qilishini kapaletke ige qilayli. muqeddes jüme we paskal yéqinlishiwatqanda, sizni (tengri amérikani saqlisun) injilning bir nusxisini sétiwélishingizni ümid qilimen.»
u hembehrligen widéosida: «barliq amérikaliqlar öyliride bir parche injilning bolushigha éhtiyajliq. mende nurghun injil bar. bu men eng yaxshi köridighan kitab. injilni sétiwélishingizni qollighanliqimdin we ilhamlandurghanliqimdin özemni shereplik hés qilimen» dédi.
tramp tonushturghan intérnét torida, injil 59.99 dollargha sétilidu.
donald trampning torda injil sétishi, yéqinqi aylarda é jin karrol ( E. Jean Carroll) isimlik ayalgha béridighan tölem we öy-mülük aldamchiliqi délosida qoyulghan jerimane sewebidin iqtisadiy qiyinchiliqqa duch kelgenliki dep qaralmaqta.
sabiq pirézidént ilgiri özining saylam seperwerlik paaliyetliri dairiside iane toplash üchün tenheriket ayighi we özining alem uchquchisi, padichi (kowboy) hemde derijidin tashqiri qehriman pérsonazh obrazi chüshürülgen oyun qertlirini satqan idi.
