isirailiye wekiller ömikining washington ziyaritini emeldin qaldurdi

türkiye awazi radiyosi xewiri: isirailiye amérikaning b d t xewpsizlik kéngishide qobul qilinghan ghezzede urush toxtitishqa munasiwetlik qarar layihesige awaz bérish hoquqidin waz kechkenlikige  naraziliq bildürüp, refah herbiy herikitini muzakire qilish üchün washingtongha baridighan wekiller ömikining ziyaritini emeldin qaldurghanliqini élan qildi.

isirailiye bash ministirliq axbarat ishxanisi bayanat élan qilip, b d t xewpsizlik kéngishide bir biterep awazgha qarshi 14 awaz bilen qobul qilinghan layihege naraziliq bildürdi.

amérikaning bir qanche kün ilgiri urush toxtitishni ghezzediki esirlerning qoyup bérilishige baghlighan b d t xewpsizlik kéngishidiki «izchil meydanidin waz kechkenliki» eskertilgen bayanatta, «amérika esirlerni qoyup bérish sherti bolmighan urush toxtitish chaqiriqini ret qilmidi» déyildi.

amérikaning biterep turghanliqining, washingtonning urush bashlanghandin buyan b d t xewpsizlik kéngishidiki izchil meydanidin roshen halda arqigha chékingenlikini bildüridighanliqi qeyt qilinghan bayanatta:

«bu arqigha chékinish hem urush toxtitish tirishchanliqigha hemde esirlerni qoyup bérish tirishchanliqlirigha ziyanliq. chünki xelqaraliq bésim, esirlerni qoyup bermey turup urush toxtitishni kapaletke ige qilish mesiliside hamasni ümidlendüridu» déyildi.

bayanatta, isirailiyening refah shehirige hujum qilishini muzakire qilish üchün washingtongha baridighan wekiller ömiki ziyaritini emeldin qaldurghanliqi eskertildi.

b d t xewpsizlik kéngishi ghezzede ramizan éyida (11-marttin 9-aprélghiche) uzun muddetlik we sijil urush toxtitish teklip qilinghan qarar layihesini qobul qilghan idi.