b d t ramizanda urush toxtitish qararini maqullidi

türkiye awazi radiyosi xewiri: b d t xewpsizlik kéngishining waqitliq ezaliri bolghan aljiriye, ékwador, giwiyana, yaponiye, malta, mozambik, koréye, sérraléon, slowéniye we shiwéytsariye qatarliq döletler teyyarlighan qarar layihesi awazgha qoyuldi.

layihe bir awazning (amérika) hoquqidin waz kéchishi, 14 awazning qollishi bilen maqullandi. buning bilen, isirailiye ghezzedge hujum bashlighan 7-öktebir (2023) din buyan tunji qétim b d t xewpsizlik kéngishide urush toxtitish telep qilinghan bir qarar layihesi qobul qilinghan boldi.

qararda, b d t xewpsizlik kéngishining pelestin mesilisi toghrisida hazirghiche maqullanghan qararlar xatirilitilgen halda, barliq tereplerning xelqaraliq qanun we kishilik hoquq qanunlirigha boysunush mejburiyitining barliqi tekitlendi.

ammiwi ul-eslihelerge qilinghan hujumlar we her türlük térrorluq heriketliri eyiblengen qararda, esir tutushning xelqaraliq qanungha xilap ikenliki qeyt qilindi.

ghezzediki qorqunchliq insani tiragédiyelerdin endishe qiliniwatqanliqi bildürülgen qararda, misir, qatar we amérikaning diplomatik tirishchanliqliri étirap qilindi.

qararda, «ramizan éyida barliq terepler hörmet qilidighan urush toxtitishni kapaletke ige qilish, buning uzun muddetlik we sijil urush toxtitishqa yol échishi, barliq esirlerni shertsiz qoyup bérish» telep qilindi.

qararning axirida, tereplerge esir tutuluwatqan kishilerge qarita xelqaraliq qanun boyiche mesuliyitini ada qilish chaqiriq qilindi we buning yéqindin közitilidighanliqi eskertildi.