pelestinning yéngi bash ministiri: ghezzesiz dölet bolmaydu

türkiye awazi radiyosi xewiri: pelestin xewer agéntliqi — wafaning xewirige qarighanda, bash ministir muhemmed mustapa dölet reisi mehmud abbasqa <19-hökümetni teshkillesh wezipisini qobul qilghanliqi> toghrisida mektup yollighan.

u mektupida, israiliyening 2023-yili 7-öktebirdin buyan dawamlashturuwatqan ghezze hujumliri toghrisida toxtilip: «milliy dewayimiz bashtin kechürüwatqan bu basquchning, iradilik xelqimizning qiyin sharaitining we nöwettiki qiyinchiliqlarning éghirliqini bilimen» dégen ibarilerge orun bergen.

mustapa mektupida ghezze mesilisini  alahide tekitlep: «ghezzesiz dölet bolmaydu, ghezzedimu quddus we iyordan deryasining gherbiy qirghiqidin yiraq dölet bolalmaydu» dégen.

u «döletning her qaysi sheherliride, bolupmu pelestinning menggülük paytexti quddusta élip bériliwatqan qatilliq, séliniwatqan weyranchiliq, yehudiy köchmenler térrorluqi bilen israiliyening basturup kirip qolgha élish qilmishliri hemde israiliye hökümiti yolgha qoyghan iqtisadiy muhasire we pelestin meblighini musadire qilish siyasetlirini eskertip ötken.

pelestinning yéngi bash ministiri mustapa yene: «pelestin xelqi duchar boluwatqan hujumlar téximu köp küch serp qilishni, seplerni birleshtürüshni shundaqla ereb we xelqara sehnide dawamliq ishleshni telep qilidu» dégenlerni qeyt qilghan.

u yéngi hökümet testiqlanghan haman ghezzediki kishilerning azabini yenggillitish üchün tirishidighanliqini bayan qilghan.

pelestin asasiy qanunining 65-maddisidiki belgilimige asasen, hökümet teshkillesh wezipisini üstige alghan yéngi bash ministir üch hepte ichide kabinét ezalirini békitip, testiqlitish üchün dölet reisige yollishi shert. yéngi hökümetni teshkillesh üchün eng köp bolghanda qoshumche ikki hepte möhlet bérilidu.