xitay amérikaning teywen bilen herbiy munasiwet ornitishigha qattiq naraziliq bildürdi

türkiye awazi radiyosi xewiri: xitay tashqi ishlar ministirliqi bayanatchisi wang winbin paytext béyjingda ötküzülgen kündilik axbarat élan qilish yighinida, amérikaning teywen bilen herbiy munasiwet ornitishigha shundaqla teywenge qoral sétip bérishige qarshi turidighanliqlirini tekitlidi.

bayanatchi wang amérika hökümitini «bir xitay» pirinsipida ching turup, xitayning ichki ishlirigha arilishishni toxtitishqa chaqiriq qildi we «xitay igilik hoquqi we zémin pütünlükini qoghdash üchün kéreklik qedemlerni tashlaydu» dédi.

bayanatchi wang washington dairilirining xitay toghrisidiki xata tonushini dawamlashturiuwatqanliqini, menpiy riqabet uqumi bilen munasiwetlerge éniqlima bérishning we nöl yighindiliq oyunning logikisi bilen qarshi terepni yoqitishqa urunushning peqet ikki döletni toqunushqa shundaqla düshmenlishishke élip baridighanliqini éytti.

bayanatchi wang aldinqi heptimu xitay dölet xelq qurultiyida chaqirghan muxbirlarni kütüwélish yighinida, diplomatiye ministiri wang yining sözlirini tekrarlap: «eger amérika xitayni basturush tersaliqini dawamlashturidighan bolsa, axirida özige ziyan salidu» dégen idi.

amérika hökümiti 2025 - yilliq xamchot teklipide, teywenning özini mudapie qilishgha yardem bérish üchün tunji qétim 100 milyon dollarliq alahide meblegh ajritishni telep qilghan idi.

amérika dölet mudapie ministirliqimu amérikaning tinch okyandiki chékindürgüch küch iqtidari dairiside, teywenning rayondiki tajawuzchiliqqa qarshi qoral ambirini yéngiliyalishi üchün 500 milyon dollarliq xamchot ajritip bérish kéreklikini telep qilghan idi.

xitay öz zéminining bir qismi dep dewa qilip kéliwatqan teywen, 1949-yildin buyan emeliy shekilde musteqilliqini saqlap kelmekte.