hamas kélishimning shertlirini élan qildi
hamas siyasiy biyuro ezasi heniyye ghezzede urushning axirlishishi, isirailiye eskerlirining chékinishi we yurt-makanliridin ayrilishqa mejbur bolghan pelestinliklerning qaytishi kapaletke ige bolmastin,isirailiye bilen kélishim tüzülmeydighanliqini bildürdi.
türkiye awazi radiyosi xewiri: hamas siyasiy biyurosi ezasi ismail heniyye téléwiziye qanili arqiliq élan qilinghan nutuqida, isirailiye bilen ötküzülüwatqan muzakireler toghrisida melumat berdi.
u hamasning muzakirelerde ijabiy we mesuliyetchan pozitsiyede bolghanliqini eskertip, mundaq dédi:
«ghezzede urushni axirlashturmighan, yurt-makanliridin ayrilghanlarni öylirige qayturup kelmigen we düshmenni ghezzening sirtigha chékinishini kapaletke ige qilmighan kélishimni tüzüshni xalimaymiz. bu pirinsiplarning emelge éshishi we kélishimning tüzülüshi üchün isirailiyeni buninggha boysunushqa mejburlaydighan xelqaraliq kapaletlerning bolushi shert.»
u isirailiyening kélishim pirinsiplirigha emel qilish mesiliside héchqandaq kapalet bérishni xalimighanliqi üchün hazirghiche kélishim hasil qilinmighanliqini tekitlidi.
u isirailiyening yurt-makanliridin ayrilghanlarning tedrijiy halda öylirige qaytishini otturigha qoyghanliqini, emma buninggha munasiwetlik éniq melumat bermigenlikini we ghezzeni dawamliq ikkige bölüwatqanliqini qeyt qildi.
u isirailiyening pelestin xelqige qarshi pisxikiliq urush yürgüzüwatqanliqini, qalaymiqanchiliq peyda qilip, xelqni parchilashqa urunuwatqanliqini, emma buningda muweppeqiyet qazinalmaydighanliqini, sadir qilghan barliq qirghinchiliq we irqiy qirghinchiliqlargha qarimay, pelestin xelqini chégradin qoghlap chiqiralmighanliqini tekitlidi.
u sözining axirida quddus, iyordan deryasining gherbiy qirghiqi we chet ellerdiki pelestinliklerni eqsa meschiti we muqeddes jaylarni nishan qilghan süyiqestlerge qarshi küresh üchün bashlanghan «eqsa topani» ni qollashqa chaqirdi.
u liwan, yemen we iraq sépidiki qarshiliq körsitishke, ereb we islam dunyasida ghezzeni qollash üchün kocha-meydanlarni toldurup namayish qilghan xelqlerge rehmet éytti.
