baydin ramizanni tebriklep bayanat élan qildi

türkiye awazi radiyosi xewiri: isirailiyeni küchlük qollighanliqi sewebidin, amérikaliq erebler we musulmanlar teripidin qattiq eyibliniwatqan pirézidént baydin, ramizan éyi munasiwiti bilen yazma bayanat élan qildi.

u musulmanlarning muqeddes éyini tebrikleydighanliqini bildürüp, «ghezzede yüz bériwatqan ghezzediki azabliq pajielerdin xewerdar» ikenlikini tilgha aldi.

u: «ghezzediki urush pelestin xelqige qorqunchliq azab-oqubetlerni élip keldi. minglarche kichk balini öz ichige alghan 30 mingdin artuq pelestinlik jénidin ayrildi» dédi.

u 2 mingdin artuq pelestilikning yurt-makanliridin ayrilishqa mejbur bolghanliqini eskertip, bu kishilerning yémek-ichmek, pakize su, dora we bixeter turalghugha jiddiy éhtiyajliq ikenlikini bildürdi.

u amérikaning ghezze qirghiqigha waqitliq port qurghanliqini xatirilitip, ghezzege hawa, quruqluq we déngiz yoli arqiliq her türlük yardemlerni yetküzüshke tirishidighanliqlirini qeyt qildi.

u bayanatida, ikki dölet hel qilish charesining, isirailiye-pelestin mesilisi üchün uzun muddetlik birdinbir siyasiy hel qilish yoli ikenlikini tekitlep: «amérika esirlerni qoyup bérsh kélishimining bir parchisi süpitide, eng az dégende alte heptilik urush toxtitishning emelge éshishi üchün toxtimay tirishchanliq körsitidu» dédi.

u bayanatida islam öchmenliki üstidimu toxtilip, tunji qétim özining pirézidéntliq mezgilide islam öchmenlikige qarshi küresh istratégiyesining teyyarlanghanliqini bildürdi we mundaq dédi:

«amérikada islam öchmenlikige héchqandaq orun yoq, bu dölet étiqad erkinliki üstige qurulghan we musulman köchmenlernimu öz ichige alghan halda barliq köchmenlerning töhpiliri üstige bina qilinghan.»

amérikaliq ereb we musulmanlar 5-noyabir (2024) ötküzülidighan pirézidéntliq saylimidin ilgiri baydingha bolghan naraziliqlirini partiye ichide ötküzülgen pirézidént namzat kandidatliqi saylimida « aq bélet» (qararsiz awaz) sheklide otturigha qoyghan idi.

baydin élan qilghan bayanatliride ghezzede urush toxtitish üchün zor tirishchanliq körsitiwatqanliqlirini ilgiri sürüwatqan bolsimu, emma isirailiyege ewetiliwatqan qoral-yaragh yardemliri mesiliside hazirghiche héchqandaq emeliy heriket qilmidi.