baydinning salametliki we yéshi ikkinchi nöwet saylinishigha dexli qilamdu?
aqsaray pirézidént jo baydinning kündilik salametliki toghrisida doklat élan qilip, pirézidéntning wezipisini dawamlashturushqa dexli qilidighan héchqandaq ehwalning yoqluqini bildürdi.
türkiye awazi radiyosi xewiri: aqsaray bayanatchisi karin zhan pyér (Karine Jean-Pierre) pirézidént jo baydinning doxturi testiqlighan we uning ehwalining yaxshi ikenliki toghrisidiki doklatning mezmunini öz ichige alghan bir yazma bayanat élan qildi.
bildürülishiche, baydinning doxturi kéwin okonnor (Kevin O'Connor) ning 81 yashliq pirézidéntning yilliq salametlik tekshürüshi toghrisidiki doklatida, uning salametlikide «endishe qilidighan ehwal yoq» déyilgen.
doxtur kéwin okonnorning doklatida qeyt qilinishiche, «pirézidént özini nahayiti yaxshi hés qilidu, bu yilqi salametlik tekshürüshide kishini ensiretkidek héchqandaq ehwal bayqalmidi. u barliq mesuliyitini mustesnasiz halda normal we toluq ada qilalaydu. u 81 yash bolsimu saghlam, aktip we küchlük kishi. ijraiye kéngishige bashchiliq qilish, pirézidéntliq we bash qomandan bolush qatarliq wezipilirini muweppeqiyetlik orunliyalaydighan ehwalda. uyqu ehwalimu muqim.»
pirézidént jo baydinning salametliki toghrisidiki melumatlar, noyabir (2024) da ötküzülidighan pirézidéntliq saylimi wesilisi bilen uning yéshi we salametlik ehwali munazire qiliniwatqan waqitqa toghra keldi.
a b s qanili (ABC News) ning 9-10-féwral élip barghan elrayi tekshürüshige qatnashqanlarning %86 i, 81 yashliq baydinning ikkinchi nöwet pirézidént bolushi üchün «bek yashinip qaldi» dep qarighan.
