üch amérika eskiri qaza qilghan hujumining jawabkarliqini iraqtiki bir guruppa üstige aldi
iraqta iranning qollishi astidiki «islamiy qarshiliq körsitish guruppisi», iyordaniye-süriye chégrasidiki amérika herbiy bazisigha qilinghan uchquchisiz ayropilan hujumining jawabkarliqini üstige alidighanliqini bildürdi.
türkiye awazi radiyosi xewiri: iraqta iranning qollishi astidiki shie qoralliq küchliri bolghan «iraq islamiy qarshiliq körsitish guruppisi», iyordaniye-süriye chégrasidiki amérika herbiy bazisida üch amérika eskiri qaza qilghan uchquchisiz ayropilan hujumining jawabkarliqini öz üstige aldi.
«islamiy qarshiliq körsitish guruppisi» bayanat élan qilip, süriyediki el-shadadi, rukban we tenef bazilirigha uchquchisiz ayropilan bilen hujum qilghanliqlirini bildürdi.
bayanatta, guruppining yene israiliyediki zéwulun déngizchiliq muesselirige, teng birla waqitta hujum qilghanliqi uqturuldi.
amérika pirézidénti jo baydin: «iyordaniyening sherqiy shimalida, süriye chégrasigha yéqin jaygha orunlashturulghan qisimlirimizgha uchquchisiz ayropilan bilen hujum qilindi. hujumda üch amérika eskiri jénidin ayrilip, nurghun esker yarilandi» dégen idi.
baydin hujumgha munasiwetlik uchurlarni toplashni dawamlashturuwatqanliqlirini bildürüp: «bu hujumning süriye we iraqta heriket qiliwatqan iranning qollishi astidiki radikal qoralliq guruppilar teripidin élip bérilghanliqini bilimiz» dégen idi.
iyordaniye hökümiti bolsa, amérika armiyesige qaritilghan hujumning iyordaniye zéminida emes, belki süriye chégrasidiki tenef bazisida yüz bergenlikini élan qilghan idi.
