baydin méksika chégrasini taqaydighanliqlirini bildürdi
amérika pirézidénti jo baydin kongrede ukrainagha herbiy yardem tekilpinimu öz ichige alghan chégra bixeterliki qanun teklip-layihesi testiqlanghan ehwalda, amérika-méksika chégrasini taqash mesiliside qetiy iradige ige ikenliklirini éytti.
türkiye awazi radiyosi xewiri: pirézidént jo baydin jenubiy kaliforniyediki saylam seperwerlikide asasliq küntertip maddiliridin biri bolghan chégra bixeterliki üstide toxtaldi.
u hökümetning kongrege sunghan chégra bixeterliki qanun teklipi testiqlanghan ehwalda, amérika-méksika chégrasini derhal taqaydighanliqlirini bildürüp: «ikki partiye qollighan qanun teklipi amérika üchün yaxshi bolidu. shunga, kongre buni testiqlishi kérek» dédi.
baydin hökümiti kongrege sunghan qanun teklip layihesi, chégradin ötken qanunsiz köchmenler sani künige 5 mingdin éship ketken ehwalda, pirézidéntqa chégrani taqash hoquqi béridu. layihede chégra bixeterlikini saqlaydighan yéngi charlash qisimlirini teshkilleshke 14 milyard dollar ajritilidighan xamchot pilanini, qanunsiz köchmenlerning resmiyetlirini tézleshtüridighan xadimlarni ishqa élish we munasiwetlik üskünilerni sétiwélishqa 110 milyard dollar ajritilidighan xamchot pilanini testiqlash telep qilinidu.
chégra bixeterlikini saqlash mesulliri noyabir (2023) éyigha sélishturulghanda, dékabir éyida %31 lik éshish bilen chégradin ötken 250 minggha yéqin qanunsiz köchmenni nazaretke alghanliqlirini, bezi künlerde chégradin ötken qanunsiz köchmenler sanining 10 mingdin éship ketkenlikini bildürdi.
mesullar dékabirda tutulghan köchmenler ichide 56 mingliq reqem bilen méksikaliqlarning bnirinchi orunda, 47 mingliq reqem bilen wénézuéliqlarning ikkinchi orunda turidighanliqini eskertti.
yene bir tereptin, baydin hökümiti bilen jumhuriyetchi téksas ishtatining waliysi grég abot (Gregg Abbott) otturisidiki «tikenlik sim kirizisi» dawam qilmaqta.
amérika aliy soti éliwitsh toghrisida höküm chiqarghan bolsimu, emma téksas waliysi grég abot chégragha tartqan tikenlik simlarni téximu köpeytmekte.
u baydin hökümitini chégra bixeterliki mesiliside yéterlik tedbir qollanmasliq bilen eyiblep, qanunsiz köchmenlerning amérika chégrasidin ötüshte köp paydilinidighan «Eagle Pass» shehiridiki chégra nuqtisigha texminen töt kilométir uzunluqta tikenlik sim tartishqa perman chüshürgen idi.
