yawropa özining armiyesini qurush kérek
italiye muawin bash ministiri we tashqi ishlar ministiri antoniyo tayani (Antonio Tajani) yawropa ittipaqining tinchliqni qoghdap, toqunushlarning aldini alalaydighan armiyege ige bolushi kéreklikini bildürdi.
türkiye awazi radiyosi xewiri: italiye muawin bash ministiri we tashqi ishlar ministiri antoniyo tayani «lastampa» (La Stampa) gézitining ziyaritini qobul qilghanda, forza italiya partiyesining yawropada mudapie saheside téximu küchlük hemkarliqlarning ornitilishigha aldin ehmiyet béridighanliqini qeyt qildi.
u ottura sherqtin hindi-tinch okyanghiche bolghan rayonlarda kirizislarning yüz bériwatqanliqini, amérika, hindistan, rusiye we xitaygha oxshash küchlük döletler bar bolghan dunyada, yawropa ittipaqining toqunushlarning aldini élishta téximu muhim rol oynishi üchün «armiyesi» ning bolushi kéreklikini tekitlidi.
u mundaq dédi:
«eger dunyada tinchliq küchi bolushni xalaydighan bolsaq, yawropa armiyesige éhtiyajliqmiz. bu küchlük yawropa tashqi siyasitige ige bolushimizning asasliq sherti. bu yawropaliqlarning bixeterliki üchün shert. yawropa ittipaqi puqraliri peqet hazirning özide mewjut bolghan sheyiy bilen, yeni yawropa ittipaqi arqiliqla özini qoghdiyalishi mumkin.»
u yene, yawropa ittipaqining rehberlik sistémisini özgertip, hazirqi yawropa ittipaqi kéngishi we yawropa ittipaqi komitétining ornigha, yalghuz bir idare qurush kéreklikini ilgiri sürdi.
