israiliye qisimliri jenin panahlanghuchilar lagéri bilen  üch  doxturxanini qorshawgha aldi

türkiye awazi radyosi xewiri: pelestinning resmiy xewer agéntliqi «WAFA» ning xewer qilishiche, israiliye qisimliri topa ittirish mashiniliri bilen nurghun mehellilerge terep- tereptin bésip kirgen. mergenlirini égiz binalarning ögzisige orunlashturghan we jenin panahlanghuchilar lagérini hemmila tereptin qorshawgha alghan.

xewerde, israiliye qisimlirining kimliki téxi éniqlanmighan ikki yashni qolgha alghanliqi, jenin dölet doxturxanisining jiddiy késellikler bölümining kirish éghizining aldi we etrapini tosqanliqi hemde topa ittirish mashiniliri bilen puqralarning mal-mülüklirini we ul- eslihelirini weyran qilghanliqi bildürüldi.

pelestin dölet téléwiziye qanilining xewiride, eskerlerning yüzdin artuq israiliye herbiy aptomobili we yette topa ittirish mashinisi bilen jenin shehiri we jenin panahlanghuchilar lagérigha bésip kirip, jenin dölet doxturxanisi, ibni sina doxturxanisi we er razi doxturxanisini qorshawgha alghanliqi uqturuldi.

xewerde, bésip kirish jeryanida israiliye qisimlirining «izdep tutush tizimlikidikiler» dep türge ayrighan pelestinliklerni hujum nishani qilghanliqi, izdewatqan kishiler tépilmighan ehwalda bolsa, ularning dadiliri, aniliri yaki tughqanliridin birini tutup ketkenliki bildürüldi.

weqeni öz közi bilen körgen shahitlar bezi mehellilerde we jenin panahlanghuchilar lagérida israiliye qisimliri bilen pelestinlikler otturisida qoralliq toqunush yüz bergenlikini éytti.

pelestin qizilay jemiyitining bayanatida, israiliye qisimlirining jenin dölet doxturxanisining aldida qizilay jemiyiti jiddiy qutquzush etriti ezaliridin birini qolgha alghanliqi, rast oq bilen puti yarilanghan kishini doxturxanigha apirishqimu tosqunluq qilghanliqi bildürüldi.