liwan bash ministiri nejib miqati «biz urushni xalimaymiz» dédi

türkiye awazi radiyosi xewiri: liwan bash ministiri nejib miqati t r t  erebche qaniligha bergen bayanatida, israiliye ghezze rayonigha hujum bashlighan 7 - öktebirdin kéyin, liwaning jenubida hizbullah bilen israiliye otturisida yüz bergen özara hujumlar üstide toxtaldi.

nejib miqati liwan - israiliye chégrasidiki muteqabiliyet qaidisi (teng derijide jawap qayturush qaidisi) ning özgermigenlikini, emma xatirjem bolushqa erziydighan birer xelqaraliq kapaletningmu yoqliqini tekitlep: «biz urush qilishni xalimaymiz we tinchliqni telep qilimiz, emma her qandaq kishining liwan zéminigha hörmetsizlik qilishinimu qetiy xalimaymiz» dédi.

pelestin dewasini axirghiche qollaydighanliqini, lékin liwanni qanliq urushtin qoghdashqa tirishqanliqini tilgha alghan miqati sözini dawamlashturup, «kichik balilarni, ayallarni we yashanghanlarni chégradin qoghlap chiqirishtin bashqa yene yoqitish xaraktérliq jinayetlerni ötküzidighan bir psixologiyege ige düshmen israiliyege qarshi qandaq képilliklerni bergili bolsun? chünki ghezzege qaratqan hujumlarning her küni dawamlishiwatqanliqini köreleymiz. buninggha qarshi héchqandaq xelqaraliq naraziliq yoq» dédi.

israiliye qisimliri  bilen hizbullah otturisida  8 - öktebirdin béri chégrada yüz bergen toqunushlarda 85 neper hizbullah ezasi öltürülgen idi.