jenubiy koréye, yaponiye we xitay üch terep yighinini qaytidin bashlaydu

türkiye awazi radiyosi xewiri: jenubiy koréye, yaponiye we xitayning tashqi ishlar ministirliri jenubiy koréyening busan shehiride ötküzülgen yighinda, yaponiye bash weziri kishida fumiyo, jenubiy koréye pirézidénti yun sukyéol we xitay reisi shi jinpingning pat yéqinda uchrishishi üchün qilinidighan teyyarliqlarning süritini tézleshtüridighanliqlirini bildürdi.

jenubiy koréye tashqi ishlar ministiri parkjin: «rehberler uchrishishining üch terep hemkarliqini eslige keltürüsh we normallashturush üchün hayatiy ehmiyetke ige ikenliki toghrisida pikir birliki hasil qilindi. bashliqlar yighinini 2024-yilning bashlirida ötküzüshni pilan qiliwatimiz» dédi.

u koréye yérim arili muqimliqining «rayonning tinchliqi we parawanliqi üchün aldinqi shert ikenliki» ni tekitlidi.

u shimaliy koréyening ötken hepte herbiy jasusluq süniy hemrahini qoyup bergenlikini «ighwagerchilik» dep atidi we piyongyangning heriketlirining «rayon tinchliqi we muqimliqigha éghir tehdit peyda qilghanliqi» ni eskertti.

u shimaliy koréyege chétishliq mesililerni hel qilish üchün her derijilik alaqilerni dawamlashturush toghrisidimu kélishim hasil qilghanliqlirini qeyt qildi.

yighinda, üch dölet ministirliri rayon tinchliqi we parawanliqi üchün ijabiy rol oynash؛ iqtisad, soda we xewpsizlik saheside hemkarliqlarni tereqqiy qildurush kéreklikini tekitlidi.

yighinda yene, ministirlarning üch terepke munasiwetlik mesililerdin bashqa, rayon mesililiri toghrisidimu özara pikir almashturghaliqi eskertildi.