rusiye tereplerni musteqil pelestin döliti qurush söhbetlirini eslige keltürüshke chaqirdi
rusiye tashqi ishlar ministiri sérgéy lawrow pelestin dölitini qurush söhbet musapisining kéchiktürülmestin eslige keltürülüshini telep qildi.
türkiye awazi radiyosi xewiri: rusiye tashqi ishlar ministiri sérgéy lawrow islam hemkarliq teshkilati we ereb elliri ittipaqining moskwadiki tashqi ishlar ministirliri derijilik söhbet yighinida söz qilip: «men yene bir qétim tekitlimekchimenki, istratégiyelik mesililerge sel qarash mumkin emes. shunga uni tézdin hel qilish üchün, sharait hazirlinishi kérek. méning démekchi bolghinim, aldi bilen, tinchliq musapisini b d t teripidin qobul qilinghan xelqaraliq asaslar dairiside eslige keltürüsh üchün zörür teyyarliqlarning qilinishi kérek» dédi.
lawrow 1967-yilidiki chégralar ichide paytexti sherqiy quddus bolidighan musteqil, térritoriyesi bir gewdileshken, igilik hoquqluq pelestin dölitining qurulushini islam hemkarliq teshkilati we ereb elliri ittipaqining barliq ezalirining qollaydighanliqini eskertti.
u yene, rayondiki apet xaraktérlik insaniy kirizisini hel qilish üchün, ortaq diplomatik méxanizm otturigha qoyush kéreklikini, buningda rayondiki ereb döletlirining muhim rol oynaydighanliqini tilgha aldi we rayongha ewetilgen insanperwerlik yardemlerning yéterlik emeslikini tekitlidi.
21 - noyabir seudi erebistan, iyordaniye, misir, hindonéziye we pelestin tashqi ishlar ministirliri, shundaqla islam hemkarliq teshkilati bash katipi hüseyin ibrahim taha moskwada rusiye terep bilen körüshüp, ghezze mesilisini muzakire qildi.
