baydin: esir almashturush kélishimining pat arida tüzülidighanliqigha ishinimen
amérika pirézidénti jo baydin ghezzediki esirlerning qoyup bérilishige munasiwetlik kélishimning pat arida tüzülüshi mumkinlikige ishinidighanliqini bildürdi.
türkiye awazi radiyosi xewiri: pirézidént baydin aqsarayda her yili ötküzülidighan «teshekkür éytish bayrimi» murasimida, ghezzediki esirler toghrisidiki soallargha jawab berdi.
u pat arida ghezzediki esirlerning qoyup bérilishi üchün kélishim tüzülüp-tüzülmeydighanliqi toghrisidiki soalgha: «ashundaq bolidighanliqigha ishinimen» dep jawab berdi.
u jawabidin kéyin, mezkur mesile toghrisida tepsiliy melumat bérelmeydighanliqini, mundaqche qilip éytqanda, «bu toghrida gep qilishqa teyyar emesliki» ni bildürdi.
amérika metbuatlirida, hamas-isirailiye otturisida, pelestinlik kichik balilar we ayal mehbuslar bilen isirailiyelik ayal we balilarni almashturush kélishimining bir qanche kün ichide élan qilinishi mumkinliki ilgiri sürülgen idi.
«washington pochtisi géziti» ning ziyaritini qobul qilghan nam-sheripini ashkarilashni xalimighan bir isirailiye emeldari, isirailiye bilen hamasning, «esir almashturush kélishimining asasiy dairesi üstide pikir birliki hasil qilinghanliqi» ni ilgiri sürüp, her ikki tereptiki esirlerni guruppa sheklide teng birla waqitta qoyup bérishning pilan qilinghanliqini qeyt qilghan idi.
aqsaray dölet xewpsizlik kéngishining bayanatchisi watsonmu tünügün (19-noyabir) éks (X) adrésida hembehrligen uchurida: «téxi bir kélishim tüzülmidi, emma kélishim tüzüsh üchün qattiq tirishchanliq körsitishni dawamlashturimiz» dégen idi.
qatar bash ministiri hemde tashqi ishlar ministiri sheyx muhemmed bin abdurrahman alsani 20-noyabir: «hamas bilen isirailiye otturisida esir almashturush üchün nahayiti kichik qiyinchiliqlar qaldi» dégen idi.
