el sani: hamas bilen israiliye otturisida esir almashturushqa az qaldi
qatar bash ministiri we tashqi ishlar ministiri sheyx muhemmed bin abduraxman el sani hamas bilen israiliye otturisidiki esir almashturushqa alaqidar söhbette hel qilishqa tégishlik tiransport qatarliq kichik qiyinchiliqlarning qalghanliqini éytti.
türkiye awazi radiyosi xewiri: el sani paytext dohada yawropa ittipaqi tashqi ishlar we bixeterlik siyasiti aliy wekili josép borrél bilen muxbirlarni kütüwélish yighini ötküzdi.
borrél bilen ghezzede urush toxtitishni emelge ashurush toghrisida muzakireleshkenlikini bayan qilghan el sani, ghezzediki irqiy qirghinchiliq, acharchiliq we mejburiy köchürüsh qatarliq qilmishlarnimu muzakireleshkenliklirini éytti.
el sani urush toxtitish we insanperwerlik karidorliri échishning muhimliqini tekitlep: «bizning muhim ishimiz, derhal urush toxtitish, ghezze rayonigha qaritilghan barliq öch élish we kemsitish xaraktérlik hujumlarni, irqiy qirghinchiliq, acharchiliq we mejburiy köchürush qatarliq qilmishlarni axirlashturush we uzun yillardin buyan ghezzege yürgüzülüwatqan qanunsiz qorshawgha xatime bérish» dédi.
el sani hamas bilen israiliye otturisidiki esir almashturushning pat yéqinda emelge ashidighanliqini bildürüp: «hamas bilen israiliye otturisidiki esir almashturushta aldimizda peqet kichik qiyinchiliqlarla qaldi» dédi.
el sani ghezzege yillardin buyan yürgüzülgen qorshawni yoqitishni we bu yerdiki israiliyelik esirler mesilisinimu muzakireleshkenliklirini bildürüp, xelqara jemiyetni israiliyening ghezzede qiliwatqan qirghinchiliqigha qarshi meydanini éniq qilishqa chaqirdi.
israiliye qisimlirining qorshaw astida tutup kelgen ghezze rayonigha qaratqan hujumlirini bir yérim aydin béri dawamlashturuwatqanliqini eskertken el sani, bu hujumlarni xelqara jemiyetning tosushqa amalsiz qalghanliqini shundaqla bu hujumlarghezzede keltürüp chiqarghan insaniy, exlaqiy we qanuniy apetlerning téximu chongiyishni dawamlashturuwatqanliqini tekitlidi.
el sani israiliyenimu birleshken döletler teshkilati xewpsizlik kéngishining qararigha riaye qilip, ghezzege qaratqan hujumlarni toxtitishqa we insanperwerlik karidorlirini échishqa chaqiriq qildi.
