sérgéy lawrow iran tashqi ishlar ministiri hüseyin emir abdullahyan bilen körüshti

türkiye awazi radiyosi xewiri: rusiye tashqi ishlar ministirliqining bayanatigha asaslanghanda, tashqi ishlar ministiri lawrow bilen iran tashqi ishlar ministiri abdullahyanning ghezze rayonining weziyiti muzakire qilinghan we nöwettiki weziyetke bolghan endisheler otturigha qoyulghan söhbitide, rehberler derhal urush toxtitish we puqralargha insanperwerlik yardemlirini yetküzüsh kéreklikini tekitligen.

hamasning qoralliq qaniti izeddin qassam birigadiliri 7-öktebir etigende israiliyening pelestinliklerge we mesjidi eqsa qatarliq muqeddes qimmet qarashlirigha üzlüksiz dexli-teruz qilishlirigha jawaben «eqsa topani»  namliq keng kölemlik hujum bashlighan bolup, israiliye qisimlirimu ghezze rayonini hawadin éghir bombardiman qilishni bashlighan idi.

israiliyede 7 – öktebirde yüz bergen hujumda 310 din artuq eskerni qoshqanda, 1200 israiliyelikning qaza qilghanliqi we 5132 kishining yarilanghanliqi élan qilinghan idi.

israiliye armiyesining bildürishiche, 7-öktebirdin buyan 383 esker ölgen bolup, ularning 62 nepiri ghezze ichidiki toqunushta, altisi liwan chégrasidiki toqunushta öltürülgen.

israiliyening bildürishiche , qassam birigadilirining qolida 239 israiliyelik esir bar iken.

ghezzediki hökümetning bildürüshiche, 7-öktebirdin buyan israiliye hujumlirida ghezze rayonida kem dégende 5 ming kichk bala we 3 ming 300 ayalni qoshqanda, jamiy 12 ming 300 puqra öltürülgen.

ishghaliyet astidiki gherbiy qirghaq we sherqiy quddustimu 7 – öktebirdin buyan israiliye qisimliri we qoralliq yehudiy köchmenlerning hujumida 214 pelestinlik öltürülgen.

israiliye qisimliri ghezzede onminglighan yaridar we puqralar panahliniwatqan onlarche doxturxanini mejburiy boshitish üchün, doxturxana hoylisini yaki asasliq binalirini bombardiman qilghan. ishghal qilish jeryanida bezi doxturxanilargha bésip kirgen bolup, bu  hujumda yüzligen kishi öltürülgen we yarilanghan.