yette dölet guruhi waqitliq urush toxtitishni telep qildi

türkiye awazi radiyosi xewiri: yette dölet guruhining 2023 - yilliq nöwetchi reisi yaponiyening sahibxanliqida chaqirilghan tashqi ishlar ministirliri yighini paytext tokyoda axirlashti.

yaponiye tashqi ishlar weziri kamikawa yoko riyasetchilik qilghan yighingha amérika, kanada, gérmaniye, italiye, engliye we firansiyening tashqi ishlar ministirliri qatnashti.

kamikawa yighindin kéyin bayanat élan qilip, yette dölet guruhining israiliyening shiddetlik hujumlirigha duchar boluwatqan ghezzege insanperwerlik yardimi yetküzüp bérish üchün, «toqunushlarni insanperwerlikni chiqish qilip toxtitip turush»ni telep qilish mesiliside birdeklik hasil qilghanliqini bildürdi.

u, yette dölet guruhining israiliyening qorshawi astidiki ghezzede bash kötürgen insaniy kirizisni hel qilish üchün, jiddiy heriket qollinish kérek»likini birdek tekitligenlikini qeyt qildi.

kamikawa yette dölet guruhining (pelestin islamiy qarshiliq körsitish herikiti) hamas ning 7 – öktebirdiki hujumini eyibligenlikini tilgha élip, özlirining «toqunushta xelqara insanperwerlik qanunigha emel qilish»ning muhimliqini tekitleydighanliqlirini eskertti.

pelestin islamiy qarshiliq körsitish herikiti – hamasning herbiy qaniti bolghan «qessam birigadisi» 7 – öktebir shenbe küni israiliyege qarshi «eqsa topani» namliq keng kölemlik heriket bashlighanliqini élan qilghan؛ arqidin israiliye armiyesi urush ayropilanlirini ishlitip, ghezzede «tömür qilichlar» herikiti qozghighanliqini uqturghanidi.

künséri keskinlishiwatqan toqunushlar jeryanida hazirghiche her ikki tereptin minglarche kishi hayatidin ayrildi.