amérikada israiliyege naraziliq bildürgen oqughuchilarni «qoghlap chiqirish» teklipi sunuldi
amérikadiki jumhuriyetchiler partiyesining pirézidént namzati, jenubiy karolina kéngesh palata ezasi tim skot, uniwérsitétlarda israiliyege naraziliq namayishi ötküzgen chetellik oqughuchilarni «chégradin qoghlap chiqirish» teklipi sundi.
türkiye awazi radiyosi xewiri: kéngesh palata ezasi skot amérika uniwérsitétlirida israiliyege qarshi ötküzülgen namayishlar heqqide fokis xewerliri qaniligha bayanat berdi.
skot amérika uniwérsitétlirida israiliyege naraziliq namayishi ötküzgen oqughuchilarning choqum bedel tölishi kéreklikini we bu kishilerning «chégradin qoghlap chiqirilishi» lazimliqini otturigha qoydi.
skot yene amérika pirézidénti jo baydinning israiliyeni qollash üchün 14 milyard 300 milyon dollar yardemni öz ichige alghan 105 milyard dollarliq qoshumche xamchot telipinimu tenqid qilip, israiliye fondining bashqa fondlargha baghlanmasliqi kéreklikini otturigha qoydi we: «muhim nuqta israiliye bolishi kérek. israiliye üchün musteqil yardem pilanimiz bolishi lazim» dédi.
jumhuriyetchiler partiyesining pirézidént namzati bolghan florida ishtatining waliysi ron désantismu ilgiri pelestinni qollaydighan oqughuchilar guruppisi «pelestinge adalet oqughuchiliri» namliq guruppini mektep qorisidin cheklesh qarari chiqarghan idi.
hamasning herbiy qaniti qasim birigadisi 7-öktebir israiliyege «aqsa tufani» namliq keng kölemlik hujum bashlighanliqini élan qilghan we buninggha qarshi israiliye armiyesi urush ayropilanliri bilen ghezze rayonigha qarshi tömür qilich herikitini bashlighanliqini jakarlighan idi.
künséri keskinlishiwatqan tuqunushta her ikki tereptin minglighan kishi jénidin ayrildi.
