israiliye ghezzege «quruqluq herikiti» bashlaydighanliqi toghriliq signal berdi

türkiye awazi radiyosi xewiri: binyamin nétanyahu ghezze chégrasi etrapida wezipe ötewatqan israiliye eskerliri bilen bir yerge jem boldi.

u ammiwi ortaqlishish tor béti X sehipiside, bu heqte élan qilghan sinliq bayanatida, «ghezzege  quruqluq herikitini bashlashqa teyyarmiz» dédi.

israiliye dölet mudapie ministiri yoaw gallantmu ghezze chégrasidiki eskerlerni ziyaret qildi.

gallant bu yerdiki israiliye eskerlirige xitab qilip mundaq dédi:

«hazir siler ghezzeni yiraqtin körüwatisiler, uzun ötmey uni ichidinmu körisiler.»

gallant yene, liwan chégrasidiki hizbullah bilen bolghan jiddiychilik üstide toxtilip mundaq dédi:

«eger hizbullah urush bashlimaqchi bolsa, aldi bilen ghezze shehirining menzirelirige qarishi kérek.»

hamasning herbiy qaniti bolghan qassam birigadiliri 7-öktebir shenbe küni israiliyege qarshi «eqsa topani» namliq keng kölemlik hujum qozghighanliqlirini élan qilghanidi. ghezzedin israiliyege minglighan rakétamiyot étilghan, qoralliq guruppilarmu rayondiki olturaq rayonlargha kirgenidi.

israiliye armiyesi bolsa, urush ayropilanliri bilen ghezze shehirige «tömür qilich herikiti» qozghighanliqlirini bildürgenidi.

igilinishiche, barghanséri keskinlishiwatqan toqunushlarda her ikki tereptin minglarche kishi jénidin ayrilghan.