israiliyening ghezze qetliami 13 – künige qedem qoydi

türkiye awazi radiyosi xewiri: israiliye armiyesi 7-öktebir küni bashlanghan urushning 13-künige qedem qoyghan kéchiside ghezze rayonining herqaysi jaylirini kéchiche bombardiman qildi .

israiliye armiyesining 7 – öktebirdin buyan ghezzege qaratqan hujumliri mabeynide 3000 din artuq adem qaza qildi, 13 minggha yéqin adem yarilandi.

israiliye armiyesining ghezzening xan yunus shehirige qilghan hujumliri netijiside, bu yerdiki binalar pütünley weyran boldi.

xelq mudapie etretliri bilen yerlik ahaliler izdesh - qutquzush paaliyetlirini bashlidi.

igilinishiche,, israiliye urush ayropilanliri ghezze rayonining herqaysi jaylirini, ichide öy – makanliridin ayrilip qalghan kishiler panahliniwatqan birleshken döletler teshkilati pelestin musapirlirigha yardem bérish orginigha tewe bir mektepnimu bombardiman qilghan.

israiliye armiyesi yene, ghezze rayonining ottura qismidiki nuseyrat musapirlar lagéridiki eqsa shéhitliri jamesige hujum qilghan, hujumda adem ölüsh we yarilinish ehwali körülgen.

bu jamede israiliyening hujumliridin qachqan nurghun aililer bar bolup, hujum rayongha keng kölemlik weyranchiliq élip kelgen.

hujumdin kéyin, dawalash etretliri yarilanghanlarni etraptiki öylerge orunlashturushqa tirishqan.

yene bir tereptin, israiliye resmiy dölet téléwiziye qanili (KAN), israiliye armiyesining ghezze rayonigha quruqluq herikiti qozghash  üchün teyyarliq xizmitini tamamlighanliqini uqturghan.

hamasning herbiy qaniti bolghan qassam birigadiliri 7-öktebir shenbe küni israiliyege qarshi «eqsa topani» namliq keng kölemlik hujum qozghighanliqlirini élan qilghanidi. ghezzedin israiliyege minglighan rakétamiyot étilghan, qoralliq guruppilarmu rayondiki olturaq rayonlargha kirgenidi.

israiliye armiyesi bolsa, urush ayropilanliri bilen ghezze shehirige «tömür qilich herikiti» qozghighanliqlirini bildürgenidi.

igilinishiche, barghanséri keskinlishiwatqan toqunushlarda, her ikki tereptin minglarche kishi jénidin ayrilghan.