argéntinada yehudiylar bilen pelestinlikler namayish qildi

türkiye awazi radiyosi xewiri: argéntina boinus ayrista yashaydighan solchi guruppilarning chaqiriqi bilen bir yerge toplanghan yüzlerche kishi, isirailiyening ghezzege qiliwatqan hujumlirini eyiblidi.

ghezzege qiliniwatqan hujumlarning toxtitilishini telep qilghan namayishchilar, pelestin xelqini qollidi.

boinus ayristiki yehudiy jamaitining chaqiriqi bilen toplanghan yehudiylar isirailiyeni qollap namayish qildi.

girétsiyening selanik shehiride pelestinni qollash namayishi ötküzüldi

girétsiyening selanik shehiridiki aristotélus meydanida her xil solchi guruppilar we pelestinlikler bayraq hemde lozunkilarni kötürüp, pelestinni qollap namayish ötküzdi.

namayishchilar «yoqalsun isirailiye», «amérika isirailiyeni qollashni toxtat» dep shoar towlidi.

girétsiye saqchiliri qattiq bixeterlik tedbirlirini alghan namayish, selaniktiki amérika konsulxanisi aldida tinch shekilde axirlashti.

girétsiyening bashqa sheherliridimu pelestinni qollash namayishliri ötküzüldi.

biraziliyedimu pelestinni qollash namayishi ötküzüldi. namayishchilar bayraq we her xil lozunkilarni kötürüp, pelestinni qollap shoar towlidi.

iyordaniyedimu ghezzeni we pelestin qarshiliq körsitish herikitini qollash meqsitide piyade yürüsh namayishi ötküzüldi. musulman qérindashlar teshkilatining siyasiy qaniti bolghan islamiy xizmetler fironti partiyesining teklipige binaen «ulghayghan topan» shoari astida ötküzülgen yürüshke, minglarche kishi qatnashti.

liwiyening tiripoli shehiridiki shéhitler meydanida toplanghan yüzlerche kishi pelestin bayriqini kötürgen halda ghezzeni qollap shoar towlidi.

tunista adwokatlar pelestinni qollap namayish qildi. namayishchilar pelestin we tunis bayraqlirini lepilditip, «pelestin zéminlirini erkinleshtürüsh üchün birdinbir yol- qarshiliq körsitish», «qarshiliq körsitishni qollaymiz, normallishishni ret qilimiz» dep shoar towlidi.

iyordan deryasining gherbiy qirghiqidiki ramallah shehiride bir yerge toplanghan kishiler, mesjidi eqsa we ghezzeni qollash namayishi ötküzdi.

gérmaniye paytexti bérlinde ötküzülüshi pilanlanghan «pelestin bilen hemkarlishish yighilishi» gha ruxset qilinmidi.

bérlin saqchi dairiliri bu heqte élan qilghan bayanatta, «pelestin bilen hemkarlishish meqsitide bérlinning oxshimighan rayonlirida ötküzülmekchi bolghan yighilish we buninggha munasiwetlik piyade yürüsh qatarliq paaliyetler, jemiyet tertipi we bixeterliki nuqtisidin tehdit peyda qilidighanliqi üchün meni qilindi» déyildi.

hamasning herbiy qaniti qassam birigadiliri shenbe (7-öktebir) küni isirailiyege «eqsa topani» namida keng kölemlik hujum bashlighanliqini élan qilghan idi. hamasning hujumida, ghezzedin isirailiyege minglarche rakéta étilghan we qoralliq guruppilar rayondiki ahaliler rayonigha bésip kirgen idi.

isirailiye armiyesimu buninggha qarita «tömür qilich» namliq heriket bashlighan idi.

ikki terepning toqunushlirida yüzlerche kishi jénidin ayrildi.